Revision 23392 of "Ўспомні!.." on bewikisource

{{Загаловак
 | назва     = Ўспомні!..
 | аўтар     = Янка Купала
 | секцыя    = Верш
 | папярэдні = 
 | наступны  = 
 | крыніца   = http://rv-blr.com/verse/showCollection/2673#29773
 | год       = 1914
}}

<poem>
                       ''Ул. Станкевічанцы''

Ўспомні, як згубіш крыльлі арліны,
Што моц у высях даюць лунаць,
І сіл ня хопіць табе, дзяўчына,
Сьвет і самую сябе змагаць!

Ўспомні, як сетку з пут павуціных
Мачыха-доля спляце у жыцьці, —
Як на расстайных станеш пуцінах
І не згадаеш, кудой пайсьці!

Ўспомні, як згубіш ворага й друга, —
Жыць пачнеш ценем з-пад курганоў
Бязь веры ў шчасьце, бязь верных слугаў —
Думак дзявочых, дзіцячых сноў!

Ўспомні, як ночка ляжа навокал,
Вецер засьвішча ў хаўтурны тон,
А сэрца дрогне, бы ў клетцы сокал,
І ў душы ўскрэсьне здань быўшых дзён!

Ўспомні, ня ў хвілю радасьці дзіўнай, —
Зь іншым разьдзеліш радасьць сваю, —
І не мяне ты ўспомні, дзяўчына, —
Ўспомні, от… гэту думку маю!

(''1914'')
</poem>

[[Катэгорыя:Спадчына]]