Revision 13773 of "၁၃၃၉-ဗာႏ၊ နောင်ယာသုဲင်ꩻ အကွို့ꩻ(၄)" on blkwiki

မဥ်ႏမာꩻစားန၀်ꩻစားန၀်ꩻ လိတ်အုပ်တဲ့ သွုမ်ꩻဗာႏတ၀်း၊ န၀်ꩻထွူတွော့ꩻ မွေးသွူ၊ ဖျော်သဲင်ꩻလဲဥ်းသွူ ကျောင်ꩻနင်းပုဂ္ဂိုလ်ႏစူကိုန၀်ꩻ အီႏထွူလဲဥ်းဟောင်း? သမ်းလꩻထွူတ၀်းဒွိုန်းနေနေ၊ န၀်ꩻတွော့ꩻ တကာႏဒုံကိုဖုံႏ ပေႏပေႏတန်တန်၊ ဖြားဖြားဆားဆား ကားတဲင်လိတ်အုပ်ကိုန၀်ꩻ ၀င်ꩻတဲမ်းနေးမုဲင်ꩻ? ၀င်ꩻရိုꩻနုဲင်းမုဲင်ꩻ? ၀င်ꩻရေႏရွယ်ႏချက်၊ ၀င်ꩻမဲ့ငါမိုးလွေꩻမုဲင်ꩻန၀်ꩻ ဖေႏနေး၀ွေꩻသီးကသေနာႏ စွုမ်ႏဖြာꩻစွုမ်ႏဖြာꩻန၀်ꩻ သမ်းအ၀်ႏလိုႏက၊ တိန်ႏလိုႏနုဲင်းန၀်ꩻတဲင်တွော့ꩻ ကျောင်ꩻနင်းပုဂ္ဂိုလ်ႏဖွော် ပုဂ္ဂိုလ်ႏမွဥ်ꩻဖုံႏန၀်ꩻ အတကာႏဖွော် တကာႏမွဥ်ꩻ တဒုံယိုန၀်ꩻ ၀င်ꩻနီ၀င်ꩻနီ ဖေႏနေးကထူႏရေꩻ လိတ်အုပ်ယိုန၀်ꩻ သမ်းလိုႏမာꩻက အစွိုꩻပေႏသနဲ့နော် ။
စိန်ႏမာꩻသွူနုဲင်းန၀်ꩻလဲင်ႏခါတဲင်တွော့ꩻ အွို အ၀်ႏအွိုးဗဟိုႏဌာႏနန၀်ꩻ ဖျော်သဲင်ꩻခန်း ကျောင်ꩻနင်းပုဂ္ဂိုလ်ႏထျꩻ၊ အ၀်ႏကျောင်ꩻနင်းပုဂ္ဂိုလ်ႏ န၀်ꩻလဲင်ႏခါ စွုမ်ႏလမ်းစွုမ်ႏလမ်း ဖေႏနေးကစွစ်ꩻန၀်ꩻန၀်ꩻ အ၀်ႏအဗွေႏဗွန် ဖေႏသဲင်ꩻခန်းအစွိုꩻပေႏသားန၀်ꩻ၊ အ၀်ႏအစွိုꩻပေႏသားန၀်ꩻ တုတ်ꩻခန်း၊ စိန်ႏတုတ်ꩻန၀်ꩻ မွေးသွူလဲင်ႏခါ " စွုမ်ႏလမ်းစွုမ်ႏလမ်း လꩻသွူတအုပ်တအုပ်ယိုဟုဲင်း" န၀်ꩻတွော့ꩻ ယင်ဟန်ႏန၀်ꩻ သမ်းတဖတ်ဒါႏတ၀်းလိတ်၊ ပိတ်ခန်းအဖတ်ဒါႏကရိုꩻတဲ့ နီပအို၀်ႏသီးယိုန၀်ꩻ ထာꩻလိုပ်ꩻသား၊ ထာꩻခွုမ်သားတဲင်တွော့ꩻ မွူးယာခိုႏန၀်ꩻ အလွေꩻမွိုင်းဒျာႏသွို့ꩻ၊ အလွေꩻမွိုင်းဒျာႏခြံ၊ လိတ်ဖတ်ခိန်ႏအဲဥ်ထ၀်း တိန်ႏရိုꩻန၀်ꩻ မွူးဟာခိုႏဖုံႏန၀်ꩻ ယဟန်ႏသား သမ်းလယ်ႏလို့ဒျာႏထာꩻ ။
နုဲင်းန၀်ꩻဟ လိတ်အုပ်ယို မဥ်ႏတဖတ်တ၀်း အကျိုꩻသမ်းအဲဥ်ထ၀်း နုဲင်းဗွေႏစင်ꩻကရိုꩻန၀်ꩻဟွဥ်ႏန၀်ꩻသနဲ့၊ လိတ်အုပ်ယို ဖြေꩻအဖတ်တာႏဒျာႏ၊ အပူႏဇောႏတာႏ မွေးတ၀်းန၀်ꩻဟ၊ ကွပ်ပွိုးန၀်ꩻမꩻတဲင် ဖေႏနေးလိုꩻတွိုင်ꩻလိုꩻတွိုင်ꩻ လိတ်အုပ်ကိုယို၊ လိတ်စောင်ႏကိုယိုန၀်ꩻ ၀င်ꩻရေႏရွယ်ႏချက်နေးမုဲင်ꩻ? ၀င်ꩻမဲ့ငါမိုးလွေꩻမုဲင်ꩻ ဖေႏနေးကသေအရသာႏန၀်ꩻ သမ်းအီႏမာꩻဗာႏနုဲင်းမုဲင်ꩻ? လိုꩻကဖတ်ဒါႏ ဒေါ့ꩻခန်းအမွေးလဲဥ်း ။
လိုꩻတဖတ်ဒါႏတ၀်းလိတ်သားန၀်ꩻ နေးတွမ်ႏတမုဲင်ꩻအာႏဏာႏ၊ နေးတွမ်ႏဖြားဒုံအာႏဏာႏ တရိုꩻတ၀်း၊ ဖြားဒုံတမွေးတ၀်းတဲ့ လိုꩻဒုံကို သြဇာႏအာႏဏာႏကအ၀်ႏဒါႏ ပုဂ္ဂိုလ်ႏန၀်ꩻ တရိုꩻတ၀်း၊ မွေးတ၀်းတဲ့ နေးတွမ်ႏလိုꩻကျောင်ꩻသီးအာႏဏာႏတရိုꩻတ၀်းတဲင်တွော့ꩻ ချꩻလွဥ်ဖြားဒုံလမ်း တရိုꩻတ၀်း၊ ချꩻထင်ႏကျောင်ꩻကိုတရိုꩻတ၀်း၊ ချꩻထင်ႏတရောပ်ကိုတရိုꩻတ၀်းတဲင်တွော့ꩻ တဟာယိုန၀်ꩻ ၁-နားရီႏတရိုꩻတ၀်း၊ တခွယ်ꩻတရိုꩻတ၀်းန၀်ꩻတဲင်တွော့ꩻ လိုꩻကဖတ်ဒါႏလိတ်၊ လိုꩻင၀်းဖြွောင်ႏဖြွောင်ႏ၊ လိုꩻင၀်းသျင်ꩻသျင်ꩻန၀်ꩻ ဖတ်နယ်ဖေႏ တဟာတစိꩻစိꩻတွော့ꩻ -
" လိတ်ယိုန၀်ꩻ၊ အရဲဥ်ႏယိုန၀်ꩻ၊ အမဲ့ငါယိုန၀်ꩻ၊ အပွိုက်ယိုန၀်ꩻ ၀င်ꩻရေႏရွယ်ႏနုဲင်းယို၊ နုဲင်းယိုသနဲ့၊ ယိုန၀်ꩻ အရိုꩻနုဲင်းယိုသနဲ့" မဥ်ႏသျင်ꩻနယ်ဖေႏ နုဲင်းန၀်ꩻစားန၀်ꩻ၊ မဥ်ႏမာꩻဖေႏနုဲင်းန၀်ꩻစားန၀်ꩻန၀်ꩻ သဲစ်လိတ်အုပ်ကထန်ႏတဲ့ နီပအို၀်ႏဧရိယာႏကိုတဲ့ စွစ်ꩻလꩻလို့ဒျာႏ၊ လိုꩻတွိုင်ꩻစွုမ်ႏဖြာꩻစွုမ်ႏဖြာꩻ "လိတ်အုပ်ကထန်ႏ အလဲင်ႏယိုန၀်ꩻန၀်ꩻ အဓိပ္ပါယ်ႏရိုꩻနုဲင်းမုဲင်ꩻ? ၀င်ꩻရေႏရွယ်ႏနေးမုဲင်ꩻ? ၀င်ꩻမဲ့ငါ မိုးလွေꩻမုဲင်ꩻ"စတဲင် လိတ်အရသာႏနုဲင်းန၀်ꩻတဲ့ ၀ွေꩻသီးအီႏသေဗာႏဒျာႏ၊ ဗွေႏစင်ꩻသီးတွမ်ႏနီသံႏဃာႏသီး ကားကအ၀်ႏဖုံႏန၀်ꩻ သဘော်ꩻလꩻလွနုဲင်းန၀်ꩻတဲင်တွော့ꩻ -
ပတ်သဲစ်တွမ်ႏ နီပအို၀်ႏလိတ်လုဲင်ꩻအရေꩻ ဖေႏနေးကထင်ႏထို၊ ဖေႏနေးကတိုꩻတက်န၀်ꩻန၀်ꩻ နီသံႏဃာႏကားကအ၀်ႏဖုံႏန၀်ꩻ အီႏထိုမ်ႏရွမ်လွေꩻ လိတ်တဲမ်းသား၊ န၀်ꩻမꩻ အီႏမာꩻက လိတ်တဲမ်းသားစွိုꩻ၊ တွဲႏနျꩻသားအစွိုꩻ၊ ဘဏ္ဍာႏရေꩻသားအစွိုꩻ၊ တုတ်ꩻလီဖြေ့ꩻလီသားအစွိုꩻ၊ နီသံႏဃာႏသီးဖုံႏ အီႏသဲင်ꩻဆောင်ႏရွက်ဖေႏနုဲင်းန၀်ꩻအကျောင်ꩻန၀်ꩻ နီသံႏဃာႏသီး ကားကအ၀်ႏန၀်ꩻ သဘော်ꩻလꩻအကျောင်ꩻနုဲင်းန၀်ꩻ၊ နီသံႏဃာႏဆွုံꩻဖျတ်ခါꩻနုဲင်းန၀်ꩻအကျောင်ꩻ -
နီတကာႏလိုꩻတန်သီးဖုံႏ တွမ်ႏမော်ပညာႏသျိ ပညာႏသျင်ႏ ကားတဲင်ကလွဥ်ဒါႏ နီပွယ်ꩻမွူးနီꩻဟန်ႏနီꩻ ဖေႏနေးကဟွုန်ဗာႏတဲင်တွော့ꩻ နီသံႏဃာႏအနေႏ ဖေႏသေဗာႏကတိꩻ ပဋိညာဥ်ႏနုဲင်းန၀်ꩻအကျောင်ꩻ ဗွေႏစင်ꩻန၀်ꩻ အ၀်ႏယိုကို ခြုဲင်းနယ်၊ လ၀်းဟွုန်၊ သျင်ꩻပျꩻနယ်ဗာႏ နီတကာႏသီးနုဲင်းယိုသနယ် ။
တဲမ်းထန်ႏ - ၁၃၈၀-ဗွေ၊ ဒဲဥ်စေင်လောင်း (၁၃)နီꩻ၊ မွူးနီꩻ-သောကျာႏ (4-1-2019)
ဗွေႏမဟိန္ဒ-ဇ၀နာရာမ ။ ၀ေင်ꩻသထုံႏပေႏ-သီႏသဲင်ႏ<ref>တဲမ်းထန်ႏတရာꩻဟော်ꩻခွေႏကို၊ အာႏကွိုꩻအုံနောင်တရာꩻဟော်ꩻ၊ အကွို့ꩻ(၄)</ref>

===အာႏကွိုꩻ===
{{Reflist}}