Revision 13781 of "၁၃၃၉-ဗာႏ၊ အကွို့ꩻ(၃)" on blkwiki

<ref>အကွို့ꩻနီ</ref>တွိုႏန၀်ꩻမꩻ တဲမ်းလိတ်ဆရာႏဖုံႏန၀်ꩻ ခွယ်ꩻယင်းလို့၀င်ꩻ ထူႏတာႏ၀ွန်ႏပငါပရာꩻတဲမ်း၊ ဗွေႏစင်ꩻသီး ရေႏရွယ်ႏနုဲင်းန၀်ꩻ၊ နီသံႏဃာႏသီးဖုံႏတဲ့ ရေႏရွယ်ႏနုဲင်းန၀်ꩻစား၊ န၀်ꩻန၀်ꩻ လိတ်တဲမ်းဆရာႏကဏ္ဍ ။
အ၀်ႏန၀်ꩻထွူတွော့ꩻ အ၀်ႏကုဲင်တေား နျꩻထေသားကဏ္ဍ၊ န၀်ꩻတွော့ꩻ လိတ်န၀်ꩻပေါႏတဲမ်းသွူတဲင်တွော့ꩻ ခွေတဲ့တဲမ်းတမျိုꩻ၊ နာꩻတဲ့ တဲမ်းတမျိုꩻတွော့ꩻ လိတ်တဲမ်းသားယိုန၀်ꩻ ကဲဥ်းအာန၀်ꩻ ဗွေႏစင်ꩻသီးကထင်း လိုꩻပေႏန၀်ꩻ ဟမ်းပေါင်းကဲဥ်းအာအာ၊ စိန်ႏတွိုႏန၀်ꩻတဲင်တွော့ꩻ လိုꩻသီးယိုန၀်ꩻထ အတ္တနောမတိ-ကရိုꩻဒါႏ နီနမ်းတွမ်ႏနီနမ်းသဘော်ꩻ အ၀်ႏဒါႏ၊ မဲ့ꩻအခွေါင်း၀င်ꩻမကောင်၊ အ၀ွို့၀င်ꩻမကောင်၊ အကျိုꩻအ၀်ႏမကောင်၊ အ၀်ႏတ၀်းမကောင်နုဲင်းန၀်ꩻတဲ့ ပါဒါႏ၊ လိတ်ကရိုꩻန၀်ꩻ နီရိုꩻအဟ၀်တဲ့ အွိုး၀င်ꩻကထီႏသူꩻန၀်ꩻ မဲ့ꩻထွာမားအစွူႏနုဲင်းန၀်ꩻတဲ့ အ၀်ႏဒါႏတဲင်တွော့ꩻ အပဲစ်ဖေႏနေးကကင်ꩻ၊ ဖေႏနေးကသျင်ꩻန၀်ꩻန၀်ꩻ အွို လိတ်တဲမ်းသားတဲ့ အီႏအွဥ်ႏဗာႏတွမ်ႏစီꩻကန်ꩻ၊ အီႏဖွေါင်ꩻဖေႏဗာႏနေးအဖွေါင်ꩻ ။
ကွပ်ပွိုးန၀်ꩻမꩻ ပေါႏလွိုထန်ႏအဖွေါင်ꩻန၀်ꩻန၀်ꩻ ဖေႏနေး တည်းဖျတ်သားကရိုꩻဒါႏ အွိုး၀ွေꩻဗွေႏသီး လိုꩻတန်နာယကဖုံႏတရိုꩻတ၀်း၊ ၀ွေꩻဗွေႏသီး ကထေထန်ႏဒါႏ ပုဂ္ဂိုလ်ႏဖုံႏန၀်ꩻန၀်ꩻ စဲစ်ဆေꩻယင်းတလဲင်ႏ၊ အပဲစ်ဖုံႏမဥ်ႏတရအဲဥ်ထ၀်း၊ အမျိုꩻသာꩻတာႏ စိမ်စွဥ်ႏစစရာႏရာႏ အကျိုꩻမဥ်ႏအ၀်ႏဒျာႏ ကရိုꩻန၀်ꩻတဲ့ ၀ွေꩻဗွေႏသီး စဲစ်ဆေꩻမဥ်ႏထွူတွော့ꩻ ဖေႏခန်းပုံနိပ်သားန၀်ꩻ၊ အ၀်ႏန၀်ꩻမꩻ ၀ွေꩻသီးန၀်ꩻ နျꩻထန်ႏ ။
၀ွေꩻသီးမဥ်ႏနျꩻထန်ႏတိန်ႏထွူနုဲင်းန၀်ꩻတဲင်တွော့ꩻ နျꩻခြေင်ဖေႏရိုꩻန၀်ꩻတဲ့ စေးငိုꩻဖုံႏ သမ်းအ၀်ႏလိုႏ၊ ဖြေꩻလိတ်အုပ်ငိုꩻဖုံႏ၊ တမုဲင်ꩻဖုံႏ သမ်းအ၀်ႏလိုႏဖျင်၊ စိန်ႏအ၀်ႏလိုႏဖျင်နုဲင်းန၀်ꩻလဲင်ႏခါတွော့ꩻ ဘဏ္ဍာႏရေꩻသား၊ ဘဏ္ဍာႏရေꩻသားန၀်ꩻတဲ့ အ၀်ႏလိုႏနေဒွိုန်း၊ န၀်ꩻမꩻ ဘဏ္ဍာႏရေꩻသားန၀်ꩻန၀်ꩻ အီႏထိုမ်ႏဗာႏအနယ်ꩻမုဲင်ꩻ? ဖေႏနေးကဖေႏနွောင်ꩻ လိတ်အုပ်ယိုန၀်ꩻ သမ်းအ၀်ႏလိုႏစီႏဆင်ႏ၊ ကစိန်ႏတွိုႏန၀်ꩻတွော့ꩻ နီသံႏဃာႏန၀်ꩻ တဲက်တွန်ꩻဗာႏနုဲင်းမုဲင်ꩻတဲင်တွော့ꩻ နီပအို၀်ႏဧရိယာႏကို နီပအို၀်ႏစွိုးခွိုꩻယိုန၀်ꩻ ဆေ့ꩻထာꩻတမွေးတ၀်း၊ စိန်ႏဆေ့ꩻတမွေးတ၀်းတဲင် ပေါႏတလမ်းတလမ်းယိုန၀်ꩻ အွဥ်ႏဒေါ့ꩻခန်း တနေင်ႏခေါင်ꩻအကိုယိုန၀်ꩻ လိတ်လုဲင်ꩻကိစ္စ မဥ်ႏကေပ်ꩻငါတလမ်း တမတ်တမတ်၊ ထေင်းကတူႏမဥ်ႏလူႏ ပငါပရာꩻန၀်ꩻတဲးတဲ့ လိတ်အုပ်တာႏန၀်ꩻ အရလိုမ်းဒျာႏနဲ့ꩻ ယူႏနုဲင်းန၀်ꩻ ပငါပရာꩻ၊ န၀်ꩻန၀်ꩻတဲးတဲ့ ဘဏ္ဍာႏရေꩻသားအစွိုꩻ တာႏ၀ွန်ႏန၀်ꩻသနဲ့၊ မွေးနီႏ? လꩻလွဥ်ရွဥ်ငါမဥ်ႏထွူ မဥ်မာꩻနုဲင်းမုဲင်ꩻမာꩻ န၀်ꩻသနဲ့၊ န၀်ꩻတဲးတဲ့ ဘဏ္ဍာႏရေꩻသားကဏ္ဍ ။
န၀်ꩻတွော့ꩻ တုတ်ꩻဖြေ့ꩻလီ၊ လိတ်အုပ်ယိုန၀်ꩻ ပေါႏထန်ႏထွူတွော့ꩻ လွေꩻအ၀်ႏပွုမ်ႏထာꩻ ပဥ်ထွောင်းထွောင်း၊ မွေးတ၀်းတဲ့ လွေꩻအွဥ်ႏဒင်ႏဒျာႏ ဘုရာꩻခြေင်ႏ၊ ထွာလေႏဒျာႏ ယူးဆာႏ-ယူးပွီ၊ ထွာတေားဒျာႏ အတသီႏလွမ်၊ အယာထူလွမ်နေးန၀်ꩻတဲ့ အကျိုꩻတမုဲင်ꩻတဲ့ တအဲဥ်ထ၀်းန၀် ။
ကဥ်းသဲ့ꩻသွမ်ꩻ နီလိုꩻမျိုꩻတမွေးတ၀်း လဲင်ႏခါ ပေါႏလိတ်အုပ်နုဲင်းန၀်ꩻ မဥ်ႏထန်ႏသွူတွော့ꩻ အီႏဖြေꩻလိတ်အုပ် တအုပ်တဗီႏယိုန၀်ꩻ အလောႏကာႏ၊ မွေးနီႏ? မဥ်ႏအံႏစုဲင်ႏခြေင်လေႏဒျာႏ အလောင်ႏအလင်န၀်ꩻ တဗီႏတွမ်ႏရိုꩻမွုန်း လစ်ꩻငတ်ꩻသူဗီႏ တရွဲးတခန် အလောႏကာႏတ၀်းတစိꩻစိꩻ၊ ပွိုးထမုဲင်ꩻ မွော့လွေꩻထွာတွိုးနေးန၀်ꩻတဲ့ မဥ်ႏဖြေꩻအံႏထာꩻအံႏပေႏန၀်ꩻ ( ယိုန၀်ꩻ အနွိုးမွော့၊ ယိုန၀်ꩻ အဆျာႏမွော့ ) ၀ွေꩻသီးသေအရသာႏန၀်ꩻမꩻ အလောႏကာႏတ၀်းအရွဥ် ။
န၀်ꩻမꩻ ဉာဏ်ႏပညာႏ ထာꩻလိမ္မာႏ အ၀်ႏလိတ်ကို ကရိုꩻန၀်ꩻ ၀ွေꩻသီးသေနာႏတ၀်း လိတ်အရသာႏမꩻတဲင်တွော့ꩻ အီႏဖြေꩻဗာႏ လိတ်အုပ်တအုပ် တန်ႏတဗီႏတရက်ꩻပေႏန၀်ꩻ အဟွုန်လောႏကာႏ၊ ကွပ်ပွိုးန၀်ꩻမꩻ လိတ်အုပ်ယိုန၀်ꩻ ပေါႏထန်ႏသွူတဲ့ မဥ်ႏတဟော်ꩻတ၀်း၊ မဥ်ႏတဖတ်တ၀်း၊ မဥ်ႏတထူႏရေꩻတ၀်းတဲ့ အကျိုꩻထမုဲင်ꩻမုဲင်ꩻတဲ့ အဲဥ်ထ၀်း၊ ကွပ်ပွိုးန၀်ꩻမꩻ လိတ်အုပ်ပေါႏထန်ႏထွူသွူတဲ့ ဖေႏနေးကစွစ်ꩻတိုး၊ ဖေႏနေးကလီလꩻန၀်ꩻန၀်ꩻ နီသံႏဃာႏသီး ယူႏလꩻနုဲင်းမုဲင်ꩻနဲးတဲင် -
အစွိုꩻနွို့သား ကျောင်ꩻနင်းပုဂ္ဂိုလ်ႏဖုံႏအ၀်ႏ၊ န၀်ꩻမꩻ လိုꩻက၀ါႏသနာႏဒါႏလိတ်ဖုံႏ၊ မော်ဖုံႏ၊ စိမ်လိုꩻလမ်းလိုꩻကျောင်ꩻဖုံႏန၀်ꩻအ၀်ႏ၊ စိန်ႏအ၀်ႏနုဲင်းန၀်ꩻတဲင်တွော့ꩻ ခါးလားကထေ လိတ်အုပ်န၀်ꩻန၀်ꩻ ကျောင်ꩻနင်းပုဂ္ဂိုလ်ႏတွိုင်ꩻ ပုဂ္ဂိုလ်ႏတွိုင်ꩻဖုံႏန၀်ꩻ ၀ွေꩻဗွေႏသီးကျောင်ꩻကို သျင်ႏပေႏ အီႏထူႏနွောင်ꩻကားမုဲင်ꩻအုပ်၊ တကာႏဖုံႏန၀်ꩻ လမ်းငင်းပငါပရာꩻ၊ အီႏထူႏနွောင်ꩻ ကားမုဲင်ꩻအုပ်န၀်ꩻ အ၀်ႏအွိုးဗဟိုႏသူꩻန၀်ꩻ ကွီသဲင်ꩻစာႏရင်ꩻ ။
အ၀်ႏန၀်ꩻမꩻ လိတ်အုပ် (စာႏရင်ꩻ) မဥ်ႏဖျော်တရေင်တဲ့ နျꩻ-၁၀၀၀ (တရေင်လွို)၊ မဥ်ႏဖျော် ၅၀၀-ငတ်ꩻရျာꩻတဲ့ နျꩻငတ်ꩻရျာꩻ-ငတ်ꩻရျာꩻလွို၊ မဥ်ႏမာꩻစားန၀်ꩻစား၊ ဗော့ꩻန၀်ꩻထွူ လိတ်အုပ်ထန်ႏသွူတဲင်တွော့ꩻ ကျောင်ꩻနင်းပုဂ္ဂိုလ်ႏတွိုင်ꩻ ပုဂ္ဂိုလ်ႏတွိုင်ꩻဖုံႏန၀်ꩻန၀်ꩻ ၀ွေꩻမဥ်ႏကွီလွဥ် ငတ်ꩻရျာꩻတဲ့ အ၀်ႏအွိုးဗဟိုႏဌာႏန လိတ်နျꩻစက် ကိုန၀်ꩻ အီႏပသာသဲင်ꩻငတ်ꩻရျာꩻ၊ မဥ်ႏကွီတရေင်တဲ့ အီႏပသာသဲင်ꩻဖေႏတရေင်၊ ဗော့ꩻလိတ်အုပ်တရျာꩻဖျော်တဲ့ လိတ်အုပ်တရျာꩻငိုꩻန၀်ꩻ ဖေႏနေးကဖေႏထင်ႏဗာႏ ဗဟိုႏဌာႏန၊ လိတ်အုပ်တရေင် မဥ်ႏဖျော်တဲ့ လိတ်အုပ်တရေင်ငိုꩻန၀်ꩻ ဖေႏနေးကဖျော်ထင်ႏဗာႏ ဗဟိုႏဌာႏန ။<ref>တိတ်ႏဟော်ꩻတရာꩻကို<ref>အ၀်ႏတခွေႏလွုမ်ꩻ</ref>သော့ꩻလဲဥ်ႏလိတ်စောင်ႏ</ref>