Revision 15450 of "Vojaĝo al Marso" on eowikisource

{{copyvio}}
{{paĝokapo
 | titolo      = Vojaĝo al Marso
 | aŭtoro     = Giordano Azzi
 | jaro       = 1934
 | notoj = El “Heroldo de Esperanto” 2/1934.
}}
'''I'''
 
Per maŝino grandioza,<br>
de mistera fort’ movata,<br>
ni vojaĝis al kolosa<br>
land’ ĉiela, al konata<br>
ruĝebrila Mars-planedo<br>
por nin distri de l’ Ter-tedo.<br>
 
L’ Inventist’, scienca feo,<br>
plenkonanto de l’ naturo,<br>
celis por ĉi tiu kreo<br>
al la kono de l’ strukturo<br>
de la vivo de l’ homaro<br>
en la suna planedaro.<br>
 
Ni trapasis tra la spaco,<br>
tra la tempo kaj silento,<br>
ne ĝenate, en plenpaco<br>
kaj sen ombro de pripento,<br>
la spektaklon rigardante<br>
de la ter’ malgrandiĝanta.<br>
 
Ne forgesis, dum veturo,<br>
ni viziton al la Luno:<br>
la montpintoj en lumpuro,<br>
vulkanbuŝoj en plenbruno<br>
mirigite nin rigardis,<br>
interflustris, plu rigardis.<br>
 
Al la Luno scivolema<br>
ni klarigis nian celon.<br>
Ĝi nin petis fervoreme<br>
ke pri l’ lunoj de l’ ĉielo<br>
ni informu ĝin laŭ vero<br>
ĉe reveno al la Tero.<br>
 
Iun belan Mars-matenon<br>
tra l’ inundo de l’ radioj<br>
jen atingis la havenon -<br>
dum laŭtegaj niaj krioj -<br>
l’ interstela fluga ŝipo,<br>
kun bonstata ĉiu ripo.<br>
 
'''II'''
 
Da Marsanoj amasego,<br>
kun pentrinde belaj vestoj,<br>
svarmas ĉirkaŭ la ŝipego<br>
scivolante, ĉu la restoj<br>
estas ĝi de iu stelo<br>
ĵus falinta de l’ ĉielo.<br>
 
Sed vidante nin eliri<br>
ili miras malfermbuŝe,<br>
ŝajnas ion voli diri,<br>
sed la vortoj venas fuŝe.<br>
Montras ni sur kart’ ĉiela<br>
Teron, Marson, volbon stelan.<br>
 
Tiam la radi-antenoj<br>
de la Marsaj sendstacioj<br>
tuj informas pri la veno<br>
de Teranoj al Marsio.<br>
Kaj tra l’ Marsaj laŭtaj bruoj<br>
komenciĝas intervjuoj.<br>
 
Kaj ni tuj ekkonsciiĝis:<br>
ĉe virinoj kaj fraŭlinoj,<br>
amo moda jam farigis<br>
(inkluzive bopatrinoj)<br>
tute same en Marsio<br>
kiel sur la Ter’, je Dio.<br>
 
Sed demandis ni pri tio:<br>
pri milito, pri armiloj,<br>
pri malpaco de l’ nacioj,<br>
pri kolosaj detruiloj<br>
ekzistantaj sur la Tero<br>
en konkuro kun l’ infero.<br>
 
Ili diris kun fiero:<br>
ne ekzistas la militoj,<br>
detruantaj vian Teron,<br>
ne ekzistas parazitoj,<br>
la armiloj: sed ĉi tio<br>
estas nur prahistorio.<br>
 
Ne ekzistas plu malpacoj:<br>
nur popoloj laborantaj<br>
en konkordo, en plenpaco,<br>
grandiozaĵojn starigantaj;<br>
ni nin ĉiujn komprenigas:<br>
unu lingvo nin kunligas.<br>
 
'''III'''
 
Post reveno al la Tero<br>
ni informis Societon<br>
de l’ Nacioj. La aferon<br>
ĝi pristudis en sekreto<br>
dum plurjara diskutado,<br>
paroladoj de l’ estrado.<br>
 
Nun ĝi venis al konkludo:<br>
sendi tuj komisionon,<br>
kiu - post detala studo -<br>
finos per la sama tono:<br>
la popoloj plu atendu...<br>
kaj armilojn dume mendu.