Difference between revisions 312919 and 312927 on hsbwiki

'''O2''' je młodźinske towarstwo pod třěchu [[Domowina|Domowiny]], kotrež skutkuje we [[Wotrow|Wotrowje]] a wokolnych wsach. Mjeno je skrótšenka za łaćonske „ob origem” (korjenjam napřečo) a pokazuje na hłowne wotmysły zjednoćenstwa – skrućić serbske wědomje mjez přisłušnymi młodostnymi.

== Započatki ==

[[Wobraz:PICT3086.JPG|thumb|left|200px|Wotrowska młodźina při wulěće 2005.]]
Młodźinski klub O2 we Wotrowje, dźensa skrućene młodźinske towarstwo, wurosće z wšelakich šmjatow a njedorozumjenjow wokoło mejestajenja a chodojtypalenja w lěće [[2003]]. Situacija bě napjata, wjesnjenjo so dla wšelakich misnjenjow na młodźinu hóršichu. Tute njeluboznosće běchu tema rozmołwow při stražowanju meje, z kotrychž wukristalizowa so na kóncu wotmysł, njedostatki młodźinskeho dźěła we wsy wotstronić. Iniciatorojo noweho spočatka chcychu zdobom składnosć wužić a so při młodźinskim dźěle tež za skrućenje serbskeho wědomja a (přez wutworjenje wšelakich klikow nakaženeje) zhromadnosće zasadźeć. Z wobšěrnym listom wobroćichu so młodostni na wjesnjanostu Pjetaša a skedźbnichu tak na wažnosć zetkawanišća za Wotrowskich młodostnych. Tež wosadneho fararja Kilanka prosychu wo radu.
Hižo po třoch tydźenjach móžeše so nowe hibanje we wsy zjawnje prezentować: Młodostni přewjedźechu tradicionalne mejemjetanje. Holcy běchu so k tutemu nałožkej [[Serbske narodne drasty|narodnu drastu]] zwoblekli, štož njebě we Wotrowje lětdźesatki dołho hižo z wašnjom.

== Nowy domicil: Młodźinski klub ==

[[Wobraz:PICT9820.JPG|thumb|right|200px|domicil Wotrowskeje młodźiny - něhdyša šula, 2005.]]
Hłowny a komplikowany nadawk přichodneho časa bě organizowanje rumnosćow za zhromadny klub. K tomu wjedźechu iniciatorojo mnohe rozmołwy z wjesnjanostu. Nadawk wšak wopokaza so jako njewšědnje komplikowany. Hakle w nowembru 2004 so wuhlady na rumnosće za młodźinski klub polěpšichu. Zo wšak móhli so gmejnske rumnosće w starej šuli młodźinje přepodać, za to dyrbješe so wona wšak oficialnje ze zjednoćenstwom abo towarstwom stać. Młodostni rozsudźichu so – hladajo na zaměry kaž skrućenje narodnosće – po rozmołwach z [[Regionalny rěčnik Domowiny|regionalnej rěčnicu Domowiny]] Cyžowej a županku župy „Michał Hórnik” Trudlu  Kuringowej, jako młodźinski cyłk třěšnemu zwjazkej přistupić.
Hišće w decembru samsneho lěta přepoda wjesnjanosta Pjetaš młodostnym kluče do noweho domicila. Tući starachu so spěšnje wo wuhotowanje rumnosćow, organizowachu sej stare kompeje, stólcy a dalše meble. Jako bě klub najprjedy raz zarjadowany, přeprosychu sej młodostni wjesnjanow do njeho.

== Dalša dźěławosć ==

Nětko wuwi so čiła dalša dźěławosć. O2 zarjadowa blidotenisowy turněr pod hesłom „Sport – zwjazany ze spominanjom na serbskeho wótčinca”, mnoho dalšich młodźinskich a wjesnych zetkanjow. Tež silwesterski swjedźeń w starej šuli sobu wuhotowa. Sćěhowaše dalši blidotenisowy turněr wo Cup [[Michał Nawka|Michała Nawki]]. Wězo přewza klub tež tradicionalne nadawki młodźiny we wsy: Wobdźěli so na dźěłach wokoło [[Mejestajenje|mejestajenja]] a [[Chodojtypalenje|chodojtypalenja]], přewjedźe mejemjetanje a pomha při wuhotowanju wjesneho swjedźenja. Jako cyłk wobdźělichu so w O2 organizowani młodostni na wšelakich sportowych turněrach, podpěrowachu swětowe zetkanje młodźiny 2005, dojěchu sej na folklorny festiwal do [[Chrósćicy|Chrósćic]] kaž tež na zarjadowanje [[Lózy hólcy|Lózych hólcow]]/[[SG Sněhowka|SG Sněhowki]] w [[Haslow|Haslowje]], nawichu tójšto rankow a swjećichu na wjacorych dumpańcach. Tež krótkodobne wulěty, na př. na koncerty serbskich skupin, so organizowachu. Nimo toho zarjadowachu přednošk [[Beno Budar|Bena Budarja]] wo knize „Tež ja mějach zbožo”. Zhromadnosći přinošowaštej tež adwentnička na Wotrowskej farje a hodownička w klubje. 
Čłonojo O2 zetkawaja so prawidłownje póndźelu wječor, zo bychu zhromadnje młodźinske wusyłanje [[Radio Satkula|Radio Satkula]] poskali.

== Eksterne wotkazy ==

*[http://beta.interserb.de/viewsite.php?site=4 Diskusijny forum Wotrowskeje młodźiny O2]

⏎
{{Wušmórnjenje po diskusiji|Aktiwity towarstwa njejasne; słabje pisany nastawk}}⏎
⏎
[[Kategorija:Serbske towarstwo]]
[[Kategorija:Domowina]]