Revision 57906 of "Մայրիկիս (Լևոն Սյուրմելյան)" on hywikisource

{{Վերնագիր
|title=Մայրիկիս
|section = 
|previous =
|next =  
|notes = 
|author =Լևոն Զավեն Սյուրմելյան}}



<div style="padding-left:2em">
<poem>
Մայրի՛կ,
Այս գիշեր քեզի համար
Սիրտս կ՚այրի։
Մտածումիս մէջ դուն կիսարձան մ՚ես քարէ
Որուն շրթերն են բարակ, անթերի։
Մայրի՛կ,
Ապակիէ ոգի,
Գլուխ պրոնզէ,
Կոյսի մը պատկեր,
Ու մեռա՜ծ գեղուհի.
Այս գիշեր,
Յիշատակդ է խոշոր փունջեր սեւ վարդերու
Որ կը թափի՜ ուսերուս վրայ։
Յիշատակդ՝ ինծի գգուանք
Մատներէդ նուրբ եւ արծաթ.
Մտածումիս մէջ դուն լեցուն ես
Գուրգուրանքովը պզտիկ մօր,
Ու աչքերդ, օ՜ աչքերդ սեւ ու անուշ,
Լեցուն են կարծես կաթով։
Ես՝ զաւա՛կդ, հիմա քեզի չափ մեծցած,
Մատներուս մէջ հարսանեկան մատանիդ՝
Որուն ադամանդը վճիտ է ինչպէս կաթիլ մ՚արցունքէդ,
Միշտ քեզ, միայն քեզ կը փնտռեմ.
Քաղաքներուն մէջ օտար,
Երբ գիշերները կ՚անցնիմ փողոցներէն՝
Անձկութեամբ կը դիտեմ բոլոր մայրերն ու զաւակներն երջանիկ,
Տուներուն մէջ լուսաւոր...

Մայրի՛կ,
Հին ու մոռցուած երգի մը չափ քաղցր է խօսիլը քեզի,
Դո՛ւն մարմարէ սիրուհիս ու գլուխ պրոնզէ,
Որուն անշարժ շրթներն են բարակ ու անթերի,
Ըսէ՛,
Ինչպէ՛ս գտնեմ, ինչպէ՜ս գտնեմ
Իմ մեռելներս։
</poem>
</div>


''(1924)''

[[Կատեգորիա:Լևոն Զավեն Սյուրմելյան]]