Revision 5480 of "Kārnāmag ī ardaxšīr ī pābagān/Beş: I" on kuwikibooks

{{jêbirin|ne kurdî}}
1. ''pad kārnāmag ī ardaxšīr ī pābagān ēdōn nibišt ēstād kū pas az marg ī alaksandar ī hrōmāyīg ērānšahr 240 kadag-xwadāy būd.''

2. ''spahān ud pārs ud kustīhā ī awiš nazdīktar pad dast ī ardawān sālār būd.''

3. ''pābag marzobān ud šahryār ī pārs būd ud az gumārdagān ī ardawān būd.''

4. ''*ud pad staxr nišast.''

5. ''ud pābag rāy ēč frazand ī nām-burdār nē būd.''

6. ''ud sāsān šubān ī pābag būd ud hamwār abāg gōspandān būd ud az tōhmag ī dārā ī dārāyān būd ud andar dušxwadāyīh ī alaksandar *niyāgān ō wirēg ud nihān-rawišnīh ēstād ud abāg kurdān šubānān raft.''

7. ''pābag nē dānist kū sāsān az tōhmag ī dārā ī dārāyān zād ēstēd.''

8. ''pābag šab-ēw pad xwamn dīd čiyōn ka xwaršēd az sar ī sāsān bē tāft ud hamāg gēhān rōšn kard.''

9. ''any šab ēdōn dīd čiyōn ka sāsān pad pīl-ēw ī ārāstag ī spēd nišast ēstād ud harw kē andar kišwar pērāmōn ī sāsān ēstēnd ud namāz awiš barēnd ud stāyišn ud āfrīn hamē kunēnd.''

10. ''ān ī sidīgar šab hamgōnag ēdōn dīd čiyōn ka ādur farrōbāy ud gušnasp ud burzēn-mihr pad xānag ī sāsān hamē waxšēnd ud rōšnīh ō hamāg gēhān hamē dahēnd.''

11. ''pābag ka-š pad ān ēwēnag dīd abd sahist,''

12. ''u-š dānāgān ud xwamn-wizārān ō pēš xwāst ud ān ī harw 3 šab xwamn čiyōn dīd ēstād pēš awēšān guft.''

13. ''xwamn-wizārān guft kū ān kē ēn xwamn padiš dīd --- ōy ayāb az frazandān ī ān mard kas-ēw ō pādixšāyīh ī gēhān rasēd, čē xwaršēd ud pīl ī spēd ī ārāstag čērīh ud tuwānīgīh ud pērōzīh, ud ādur farrōbay dēn-dānāgān ud mow-mardān, ud ādur gušnasp artēštārān ud spāhbedān, ud ādur burzēn-mihr wāstaryōšān ud warz-kardārān ī gēhān ud hāmōyēn ēn pādixšāyīh ō ān mard ayāb frazandān ī ān mard rasēd.''

14. ''pābag ka-š ān saxwan ašnūd kas frēstād ud sāsān ō pēš xwāst ud pursīd kū tō az kadām tōhmag ud dūdag hēh? az pidarān ud niyāgān ī tō kas būd kē pādixšāyīh ud sālārīh kard?''

15. ''sāsān az pābag pašt ud zēnhār xwāst kū-m wizand ud zyān mā kun.''

16. ''pābag padīrift ud sāsān rāz ī xwēš čiyōn būd pēš pābag guft.''

17. ''pābag šād būd ud framūd kū tan pad ābzan kun.''

18. ''ud pābag framūd kū tā dast-ēw ǰāmag, paymōzan ī xwadāywār, awišāwurd hēnd ud ō sāsān dād hēnd kū paymōz. ud sāsān hamgōnag kard.''

19. ''ud pābag sāsān rāy framūd kū tā čand rōz-ēw pad xwarišn ud dārišn ī nēk ud sazāgwār parward.''

20. ''u-š pas duxt ī xwēš pad zanīh dād.''