Revision 3583 of "वर्ग:मराठी कविता" on mrwikisource

[[वर्ग:ग]]
गणपत वाणी बिडी पितांना 
चावायाचा नुसतीच काडी;
म्हणायचा अन मनाशींच कीं 
या जागेवर बांधिन माडी;

मिचकावुनि मग उजवा डोळा
आणि उडवुनी डावी भिवई,
भिरकावुनि ती तशीच ध्यायचा
लकेर बेचव जैसा गवई.
गिऱ्हाइकाची कदर राखणें;
जिरें, धणे अन धान्यें गळीत,
खोबरेल अन तेल तिळीचें 
विकून बसणें हिशेब कोळित;
स्वप्नांवरतीं धूर सांडणें 
क्वचित बिडीचा वा पणतीचा
मिणमिण जळत्या; आणि लेटणे
वाचित गाथा श्रीतुकयाचा.
गोणपटावर विटकररंगी
सतरंजी अन उशास पोतें;
आडोशाला वास तुपाचा;
असें झोपणें माहित होतें.
काडें गणपत वाण्यानें ज्या
हाडांची हीं ऐशी केलीं, 
दुकानातल्या जमीनीस तीं 
सदैव रुतलीं आणिक रुतलीं.

काड्या गणपत वाण्यानें ज्या
चावुनि चावुनि फेकुन दिधल्या,
दुकानांतल्या जमीनीस त्या
सदैव रुतल्या आणिक रुतल्या. 
गणपत वाणी बिडी बापडा
पितांपितांना मरून गेला;
एक मागतां डोळे दोन
देव देतसे जन्मांधाला !

- बा. सी. मर्ढेकर