Difference between revisions 34019 and 36171 on pflwiki

Kriddig onde offiziell [[Terrorõõschläg vum 11. Sebbdemba 2001|9/11]]-Darschdellung gäbds aach haid, zeh Joa noom Addntad, noch mea wie genuch; in Folche vunde valochene US-Polidig zum Baischbiel im Zammehong midde Kriesche in Afghanistan un im Irak odda midde velgaräschdswidrische Foldälacha uf Kuba un in onna Länna odda middäm weldwaide kriminelle Menscheraub in Regierungsufdraach hod die Zahl vun dänne, die wo des Uuglablische glaabe, doß nämlisch die Bush-Regierung zumindschd iane Finga in däm Addntad ghad hod, wannse ned alles selwad gepland un dorchgefiad hod, sogaa noch zugenumm.

Dodebai sin des aischndlich gaaned die uaschbringliche Voawärf, sunnan när ä vunde waaschainlichsde Folche devun: uaschbringlich waa do när äm Bush soi Uffruf, käänere Vaschweerungstheorie zu glaawe, obwohl doßes gaa kää gäwwe hod. 

Des hod die Laid ufmärgsam gemachd un hodse iwwapriefe geloßd, ob des, wasse gsien hon mid däm, was die Regierung vazähld, iwwaoischdimme duud. 

== Vaschweerungstheorie ==
Ä Vaschweerungstheorie is - wie de Nome ja schun sääd - die Theorie vun orra iwwa ä Vascheerung, oogfange midde Idee, doßs in däm orra sellm Zammehong orra bai däm orra sällm Äraischnis iwwahaabd ä Vaschweerung gäbd.
:''"Ä Vaschweerung",'' definiad die daitsch Wikipedia,'' "is ä haimlisch Vabindung mim Zwägg, doß mär zamme än Plaan ausfiere duud, där wu ändwärra än sälbschdsüschdich un vawäfflich Ziel vafolge un onnan Schaade duud orra wu uf die Bsaidischung vun taadsäschliche orra so ämpundn Mißschdänd abziele duud."''<ref>[[:de:Verschwörung|Ardiggl "Verschwörung"]] inde daitsch Wikipedia</ref>

Ä Vaschweerungstheorie hod pär se aach gaanix mid Kridig zu duun: wonn ich mään, doß die EVU (EnagieVasorschungsUnnanämme) de Schdaad, die Gsellschafd un iane Kund klammhaimlisch iwwa faschd hunnad Joa hie bschisse hän, don hon ich mär do ä Vaschweerungstheorie gebild. Des hod awwa mid Kridig ärschemol gaanix zu duun: wonn ich selwad Großagzionär bai dänne bin, saan ich sicha "waida so!" un hald moin Sagg waid uf. Wonn ich än õõschdännisch Mänsch un guude Birscha bin, donn bring ichs zur Õõzaisch un wonns Kardällamd don die iwwelische glääne Schdroofe vahängd, don waa moi Theorie rischdich. - Wonnse des ned duun, donn waa deshalb die Vaschweerungstheorie nuch long ned falsch, sunnan när noo dänne iane Moinung (noch) ned bewaisbaa. - Mid Kridig awwa waa doo donn gaanix.

Wonn ich hingesche de Regiarung all dän Misd un all dän Schwachsinn, wuse vazabbe, vorhaldde duu, donn is des Kridig - un hod mid närre Vaschweerungstheorie iwwahaabd nix zu duun.

Un wonn mär ä Vasischarung die Laischdung ohne Grund un när mid faadeschainisch Ausrädde vawaischad un uf moi Vordarunge schließlich sääd, se wollde ned, wonn ich des donn vor Gerichd bring un die Räschd grieje un wonn ich don erausgrieh, doß där Rischda mid däm Vasicharungsboss inde selwe schlaachende Schdudendevabindung waa, donn bring ich des alles inde Berufungsvahondlung als Kridig vor - un als Vaschweerungstheorie. Un wonn donn de Rischda im Urdääl sääd, doß ich Ooschbruch uf die Laischdung hon, donn hodda moi Kriddig als beräschdichd õõgseje. Wonna donn aach noch ärklärd, doß de vorisch Richda häd dän Fall wesche Befongehaid abgäwwe gemißd, donn hoda aach nuch moi Vaschweerungstheorie bschdädichd un isch konn sogaa dän ärschde Richda desdewesche ("Räschdsboischung") oozaische.

Des muß mär genau vaschdeen, um zu kabian, um was's bai de 9/11-Diskussion aischndlich gehd: do wärd zwar als vun Vaschweerungstheoriee gebabbld, awwa doodrum gehds dääls gaaned un dääs ärsch ledzdrongisch: 

Die Laid wolle ääfach när wisse, 
# Was genau is wägglisch bassiad?
# Wie is des genau bassiad?
# Hod mär des wägglisch ned vahinnan gekännd - un wonn, donn: warum?
# Warum is des bassiad?
# Wea hod des geduun un wea schdeggd dodehinna?

Doo ärgäwwe sisch iwwahaabd ärschd ab Pungd 3 Meechlischkaide fär ä Vaschweerungstheorie - un ärschd baim ledschde Pungd wärn se faschd zwongslaifisch. Bis doadhiie awwa is ärschdemol fasd alle när Kridig.

De Bush selwad hod also die schloofnde Hunde gewäggd ghad un mid soim Vaschwörungstheorie-Geschwafel (ohne Vaschweerungstheorie ...) druff ufmärgsam gemachd, doaß do äbbes im Busch is un ned alles mid rächde Dinge zugeje duud un doß mär bessa genau uffbaßd uf des, wasmär vazäähld gried. 

Un donn issa promd korzi Zaid schäda selwad midde ärschd Vaschweerungstheorie eriiwa kumme: De Osama bin Ladn un die alQaida sollns gewäßd soi, wu des grausich Schbegdagl do inszeniad hän.

Des is jezad ämol gonz exagd ä klassisch Vaschweerungstheorie, do schdimmd än jedes Märgmal vunde Definizion. Schad när, doßs so ä völlich haldlose Theorie is un dodemid kää ääni Frooch beandword: de binLaden soll also de Uffdrooch gäwwe hon, doß än paa vun soine alQaida-Laid flije lärne, Passaschiadschäds ändfiere, indie zwää WTC-Tärm, ins Pendagon un inde Kongress flieje un dodemid de Amis mol so rischdich zaiche, wea de Bardl is un woa de Moschd hole duud.

Des, so hääßds offiziell, wär donn aach alles so bassiad, när baim Kongreß hädde die Fluchgäschd geschdraigd un die Maschin voahea selwad abschdärze geloßd, die Helde.

Un desdewesche, wail die zwää Fliescha in die Tärm sin - so hääßds offiziell waida - desdewesche solle die donn aach glai zammegeporzld soi wie die Tärm vun Holzbauschdää vunde Bobblschärs, wonn die noom Uffbau graad alles wirra zammeschmaiße. Des is die hochoffiziell Wärsion un wailse so hochoffiziell is, wärdse aach gradso hoochoffiziell vun ännäre jede hoochoffiziell Schdäll - un vun alle, dänne se nidzd - geglaabd, waidagäwwe un vadaidichd. Awwa es allaäänzich, wo mär dodevun ned hinnafrooche muß, is die Dadsach, daß do in än jede vun dänne Tärm je ään Fliecha enoigedozd is. Un doßs dausende vun Doode gäwwe hod.

== Õõsädz fär / vun Kriddig ==
Inzwische gäbds uuzählisch wisseschafdlich Gechegudachde un aach Noowaise, doß viel wida bessa Wisse gsaad worn is, wail Bush des so wolld. So hodda zum Baischbiel es Umweldamd oogewiese mid falsche Berichde die ground-zero-Umgewung als uugfealisch oizuschdufe, obwohl doßse noch massiv mid Asbesd un onnan, noch viel gfäalichare Schdoffe kondaminiad waa.

Onna Kridigpungde sin Daaschdellunge endgeje de Naduagsädze: uf de rauchende Drimma will mär de Paß vun ääm vunde Addntäda gfunne hon. Där mißd dä also aus de Tasch un dorch die Flammekuchl aus brnnendm Kerosin gflooche soi un sich donn schdunne- wonn ned daachelong inde Lufd ufghalde hon, um sich donn grad doo niedazulosse, wo die mehrschde Drimma lieje...

Eeweso wärd moniad, doß vunde oogäwlische Addetäda, diewo jo midde Maschine in die Täürm gfloche un dodebai umkomme sin, die mehrschde sich ändwärra selwad gemeld un iane Tädaschafd beschdridde hän orra vun vaschiedene TV-Senda ausfindisch gemachd worre sin.

Noogewiese wärd, daßde Zammebruch vunde Gebäude zwaa widaschbruchsfrai dorch ä voaberaided Schbrängung ärfolchd soi konn, awwa nie dorch die Kollision midde Fliecha - un doß die amdliche Ärklärungsvasuche zum ääne änonna widaschreche, zum onnan imma när än Dääl vunde Fagde begrinde un außadäm naie Uuglaubwirdischkaide ufwärfe.

Gfrood wärd schließlich noode Abwea: die hod devoa wie denoo ääwondfrai fungzioniad un ausgereschn doo sollse vasaachd hon? Des wär, wie wonn die Faiawea saad:"Ai, mär hän des Faia gsien, awwa ned gewissd, ob daßs brenne duud. Mär hän aach de Borjamääschda frooche gewälld, ob daß mär ausrigge sollde, awwa där hod kää Zaid ghed fär zu ondworde." 

== Äänzlhaide ==
Losse mär die Frooch, wea alles des zu vaondworde hod, ob die alQaida unde binLaden, än "Küngl", wie mär in Köln säähd, vunde US-Indusdrie, die griene Männscha vum Mars odda de Bush pärseenlich, losse mär die frooch ärschdemol offe bis zu de ledschde Fagde, die wu mär inzwische wisse. Nämme mär uns ärschdemol die äänzlne Gschehnisse vor, wie mär se känne:

=== Die Tärm ===

Kridisiert werd vor allem, dass 400-600&nbsp;°C nedd ausraische, um Schdahl schmelze und die Tärm oischderze zu lasse. Es werd awwa vamuded, dass schun so ä geringi Temberadur ausraischd, um Schdahl waisch unn inschdabil zu mache. Dämzufolsch mißde donn die Wänd sich noo auße wölbe undi Degge ufänonnadodze un die jewails negschd midenunnaraise. - Gud un schee, när mißde donn awwa die Soile inde midd schdeen gebliwwe soi, awwa des sinse ned. Es äänzisch, was vun dänne gfunne worn is, des sin ä paa äänzln Schdigga, wo grad exagd so schräch oogschnidde sin, wie märs mid präzise Hohlladungsschbängunge erraischd. Un die max. 600&nbsp;°C ärkläre aach nie dän gschmolzene Schdahl uffm Boddm vun ground zero.

Waida werd kridisierd, dass die Term faschd midd Fallgeschwindigkaid oigeschderzd sinn, was sisch aach nedd dorsch waisch werdende Schdahl erkläre läßd, wohl awwa bai gezielde Schbrängunge de Fall is.

In de Näh vun de Tärm solle Doomsday-Maschine beobachded worre soi, mid denne mer aa Flugzaisch schdaiere konn.

=== WTC 7 ===

Baim WTC 7, des wo als ledschdes Geboide vum WTC zammegeschderzd is, frogd mer sisch noch dem Grund fer den Oischdurz, wail en paar brennende Balge unn Schblidder nedd ausraische, um en Gebaide oischderze zu lasse. Wie die große Term aa is des Gebaide bainah in Fallgeschwindischkaid zammegeschderzd. Aa hot de Hausmaischda unn noch annere Lait vorm Zammebruch Eksploione im Kella g'herd.

=== Pentagon ===

Baim Pentagon werd die fehlende Õõzahl an Wrackdaile kridisierd, eeweso, dass de Pilod vun dem Flugzaisch dorsch die Flugpriefung g'falle is, des Flugzaisch awwa in em schwierische Wingel ins Gebaide geschdaierd hot. Des Oischlaachsloch is ner 5 Meder groß, awwa die Boeing hot ä Schbannwaid vun 38 Meda. Vun de Videokameras, welle die Said beobachded hewwe, welle gedroffe worre is, zaische die Videouffnahme aa keen Flugzaisch zu de Oischlaachszaid . Dodezu muss mer saache, dass die maischde Uffnahme vum FBI konfiszierd worre sinn. Mer frogd sisch aa, warum des Flugzaisch uffgrund vun de hohe Lufddischd in de niedere Atmosphär bai enerer Geschwindischkaid vun 850 km/h nedd zammebroche is.

=== Shanksville ===
An dem Abschdurz bai Shanksville werd kridisierd, dass mer kaum Wrackdaile gsehe hot. Grooße Daile vun Sidz bis Turbine unn aa Laische hot mer net enddegge könne. Die klääne Wrackdääle, die mer gsehe hot, ware iwwerall kilomederwaid vabrääded. Aa is während de Abschdorzzaid en Milidärflugzaisch gsehe worre, welles sisch ufffällisch verhalde hot. De domolische Birgamaischda vun Shanksville hot de Uuglicksschdell so beschriwwe: "Do war keen Flugzaisch. Keen Flugzaisch." Jeedes Flugzaisch is außadem mid enereFlugmanever Gefahreaudomadig ausgeschdadded, welle vahinderd, dass en Flugzaisch sengreschd uff de Bode zuflieschd, wies mid dem Flugzaisch bai Shanksville basierd soi soll. Aa de Flugschraiba seschd was gonz onnere: Flug 93 is mid

=== Abwehr ===
Am Vertaidischungssyschdem werd kridisierd, dass die schdärgschd Lufdvataidischung an dem Daach vasagd hot. Obwohl mer gewissd hot, dass Flugzaisch endfiehrd worre sinn, hot mer es unnerlasse, Kambfdscheds schdarde zu losse. Aach henn am selwe Daach Milidäriiwunge schdaddgfunne, die seljenes verhinnere solle. Vun de milidärische Said kummt die Endschuldischung, dass mer zwische Ibung unn Wärklischkaid nimmi unnerschaide gekonnd hädd. Lufdwaffeeksperde bringe dem endgege, dass Ibunge imma vun de Wärklischaid gedrennd schdaddfinne unn laischd zu unnerschaide sinn.

== Sunsdisches ==

Uffällisch is aach, doß de Busch Fagde schun on die Effändlischkaid gäwwe hod, wo die CIA ärschd Schdunne schbäda gfunne ham will. Un es schdälld sisch die Frooch, warum de BinLade sich Fliescha vun Texas häd hole solle, wu faschd lea ookumme, un die vum Radaa vaschwinde losse soll, onschdad daßa glai vollgetangde Maschiene vum Kennedy-Äärpod nämmd, die wo viel mea Schade oogerichd hädde - BinLade waa zwar än Terrorisd, awwa ned bleed. Außadäm wär vorgehalde, daßs däm BinLade wohl schwea gfalle wär, die Maschine in Texas uubemärgd vum Radaa vaschwinde zu losse, äm Busch als sellmols agduelle Präsidend un voaherische Guwanöa vun Texas awwa wärs laischd gewäsd. Schließlisch ärinnan die Zwaifla aach droo, daß wie de Charter 8.000 Mann vunde CIA gschaßd hod ("Mär braache kään Schdaad im Schdaad..."), die mehrschde im Buschs ihrnem Konzärn unnkumme sin - samd ihrne Vabindunge zur Al Qaida, daß die also dorschaus die Meechlischkaid ghad hän, niederrangische Al Qaida Laid fär des Attntad zu õõgaschiere.

Aach des Argumend, kään Amerikana dääd soviel amerikanische Menschelewe fär Profid un Machd riskiere, wärd vunde Zwaifla laischd ändkräfded: sie ärinnan droo, 
* daß die Bosse geje de Uffbau vunde Gewärgschafde die Arwaidafiera vunde Pinkertons hän abknalle geloßd, 
* daßse long voahea dän ärschde Kubakriesch vum Zaun gebroche hän, indemse ääns vun iane Kriechsschiffe dord im Haafe mid Mann un Maus in die Lufd gschbrängd hän, 
* doß schun de amrikanisch Birschkriesch än raine Wärdschafdskriesch waa, 
* daß die Bosse när aus rainschda Profidgia mid dausende vun Tode dän Oitritt inde ärschde Weldkriech ärzwunge un so än rain oiropäische Konflikd ärschd zu Weldkriesch gemachd hän, 
un an noch viele onnan Baischbiele, doß de US-Induschdrie än Mänschleewe geje Profid nix gild.

Viel vunde ärschde Theorie sin inzwische ändkräfded, wailse uf falsche Berichdärschdaddung uffgebaud hän. Uf monche Frooche hods Andwodde gäwwe, die viellaich schdimme kännde, awwa viel uubeandword'd naii Frooch ufwärfe:
* Wann de Schdahl wägglich schun baide halwe Schmelzdemberadur inschdabil wärd un die Decke desdewesche nunnagedozd sin un dodebai die owwere die unnan midenunnageriß hän, wie kummd des don, daß die unnan schun falle, echa daß die owwere do ookumme sin? Un wann des wägglich när Faia waa un kää Explosionsserie vun gezielde Schbrengunge, wi kumme donn finf Tonne schwere Trimma vunde oißare Schdaaldrächa dezu, schrääch oogschnidde wie bainärre professionelle Schbrängung saidlich dorch die Lufd zu flieje? 
* Wohea kimmd des gschmolzne Metall im Kella? 
* Wieso waan die Kella dääls schun zärschdead, eecha die unnan Etage kabudd waan?
* Wieso sin hunnade odda dausende vun Auchezaischeberichde uuberigsichdichd gebliwwe?
* Wie isses meechlisch, doß so viel Aachezoische die Explosionsserie gheead hän, wonns kää gäwwe hod?

Frooche wirft aa des wennische Geld auf, des vun de US-Regierung zur Unnerschdidzung vun de Uffklärungsforschunge gewwe worre iss. Die Uffklärung vum Mord am Kennedy z.B. is mit viel mehr Geld unnerschdidzd worre.


Die maischde Verschwerungstheoredigger um de elfde Sebbdemba glaawe, die Bush-Regierung hot die Gebaide geschbrengd, um Kriege "ums Eel" zu führe unn innepoldische Reforme dorschzusedze ("Inside-Job"). Belege sinn dodebai g'funnenes Nanothermit in de Ruine unn fehlende Erklärunge fer die Aischderz.

== Cui bono - wäm hods genizd??? ==

== Äänzlnoowääs ==
<references />

== Lings, Bischa un onna Publikazione ==

* [http://therealstories.wordpress.com/911-2/ Die offizielle Daaschdellung mid aarsch painlische Frooche, Oiwänd un Õõmärkunge, baides in daitsch, dezu Quelleoogawe] dääls agdualisiad, dääls nai, '''''ärschdälld zum 11. 09. 11'''''
* Nafeez Mossadeq Ahmed: ''Geheimsache 09/11. Hintergründe über den 11. September und die Logik amerikanischer Machtpolitik'', Goldmann, München 2004, ISBN 3-442-15288-7
* Mathias Bröckers: ''Verschwörungen, Verschwörungstheorien und die Geheimnisse des 11. September'', Verlag Zweitausendeins, Frankfurt am Main 2002, ISBN 3-86150-456-1
* Mathias Bröckers, Andreas Hauß: ''Fakten, Fälschungen und die unterdrückten Beweise des 11. September'', Verlag Zweitausendeins, Frankfurt am Main 2003, ISBN 3-86150-604-1
* Andreas von Bülow: ''Die CIA und der 11. September'', 4.&nbsp;Aufl. Piper, München 2004, ISBN 3-492-24242-1
* James H. Fetzer (Hrsg.): ''The 9/11 Conspiracy. The Scamming of America.'' Transition Vendor, 2007, ISBN 978-0-8126-9612-7
* Eric Hufschmid: ''Painful Questions: An Analysis Of The Sept. 11th Attack''. Ink & Scribe, 2002, ISBN 1-931947-05-8
* Eric Laurent: ''9/11/01. Die Wahrheit'', Piper, München 2005, ISBN 3-492-04788-2
* Thierry Meyssan: ''Pentagate – Angriff auf das Pentagon'', editio de facto, Kassel 2003, ISBN 3-9808561-1-9
* [http://www.civil.northwestern.edu/people/bazant/PDFs/Papers/00%20WTC%20Collapse%20-%20What%20Did%20&%20Did%20Not%20Cause%20It.pdf Zdenˇek P. Baˇzant, Jia-Liang Le, Frank R. Greening, David B. Benson (Mai 2007; überarbeitet März 2008): ''What Did and Did not Cause Collapse of WTC Twin Towers in New York''] (PDF)
* [http://www-math.mit.edu/~bazant/WTC/WTC-asce.pdf Zdenˇek P. Baˇzant, Yong Zhou: ''Why Did the World Trade Center Collapse? — Simple Analysis.''] (PDF; 146 kB)
* [http://web.mit.edu/civenv/wtc/PDFfiles/Chapter%20VI%20Materials%20&%20Structures.pdf Oral Buyukozturk, Franz-Josef Ulm (Massachusetts Institute of Technology): ''Materials and structures''] (PDF; 1,41&nbsp;MB)
* Gerhard Wisnewski: ''Mythos 9/11. Der Wahrheit auf der Spur'', Knaur, München 2004, ISBN 3-426-77783-5
* [http://www.liveleak.com/view?i=a29_1197492261 engl. Doku]
* Marcus B. Klöckner: ''9/11 - Der Kampf um die Wahrheit (TELEPOLIS)'', Heise, 2011, ISBN 978-3-936931-71-6.
* Sandra Poppe, Thorsten Schüller, Sascha Seiler (Hrsg.): ''9/11 als kulturelle Zäsur: Repräsentationen des 11. September 2001 in kulturellen Diskursen, Literatur und visuellen Medien.'' transcript-Verlag, Bielefeld 2009, ISBN 978-3-8376-1016-1
* [http://graphics8.nytimes.com/packages/html/nyregion/20050812_WTC_GRAPHIC/met_WTC_histories_full_01.html New York Times: ''The Sept. 11 Records''] (Zeugenaussagen)
* [http://govinfo.library.unt.edu/911/report/911Report.pdf 9/11 Commission Report] (PDF-Datei; 7,22&nbsp;MB)
* [http://www.cooperativeresearch.org/project.jsp?project=911_project Cooperative Research: ''Complete 911 Timeline'']
* [http://www.nebel.cc/Geheimakte911.pdf Geheimakte 9/11, pdf-Dadai]

[[Kategorie:Bolidik]]

[[ar:نظريات مؤامرة 11 سبتمبر]]
[[bg:Конспиративни теории за атентатите от 11 септември 2001 г.]]
[[cs:Konspirační teorie o útocích z 11. září]]
[[da:Konspirationsteorier om terrorangrebet den 11. september 2001]]
[[de:Verschwörungstheorien zum 11. September 2001]]
[[en:9/11 conspiracy theories]]
[[eo:Konspiro-teorioj pri la 11-a de septembro 2001]]
[[es:Conspiraciones del 11-S]]
[[fa:تئوری‌های توطئه ۱۱ سپتامبر]]
[[fi:Syyskuun 11. päivän terroritekojen salaliittoteoriat]]
[[fr:Théories du complot à propos des attentats du 11 septembre 2001]]
[[he:תאוריות הקשר על פיגועי 11 בספטמבר]]
[[it:Teorie del complotto sull'attentato al World Trade Center dell'11 settembre 2001]]
[[ja:アメリカ同時多発テロ事件陰謀説]]
[[ko:9·11 테러 음모론]]
[[nl:Complottheorieën over de terroristische aanslagen op 11 september 2001]]
[[nn:Konspirasjonsteoriar kring 11. september-åtaket]]
[[no:Konspirasjonsteorier om 11. september]]
[[pl:Teorie spiskowe o zamachach z 11 września 2001]]
[[pt:Teorias conspiratórias sobre os ataques de 11 de setembro de 2001]]
[[ro:Teoriile conspirației atentatelor din 11 septembrie 2001]]
[[ru:Теории заговора относительно событий 11 сентября 2001 года]]
[[sh:Teorije zavjere o 11. septembru]]⏎
[[sv:Konspirationsteorier om 11 september-attackerna]]
[[tr:11 Eylül saldırıları ile ilgili komplo teorileri]]
[[vi:Các giả thuyết âm mưu về sự kiện 11 tháng 9]]
[[yi:טעאריע:סעפטעמבער 11]]
[[zh:九一一事件陰謀論]]
[[zh-yue:911陰謀論]]