Difference between revisions 18846 and 18848 on wawikisource

{{tiestire
 | tite    = Emiles 2021 da Lucyin Mahin
 | oteur   = Lucyin Mahin
 | aneye     = 2021
}}
<div>

<div class="text">
{{tite|Emiles 2021 da Lucyin Mahin}}
{{c|sicrîte pa — udon a — [[Oteur:Lucyin Mahin|Lucyin Mahin]] <small>(sovint so des sudjets a vey avou l' walon)</small> et leu response, s' il astchait|fs=125%|mtb=1}}⏎
<hr style="margin:1em 0;"/>
{{c|[[Emiles 2021 da Lucyin Mahin/I|Moes d’ djanvî]] — [[Emiles 2021 da Lucyin Mahin/II|Moes d’ fevrî]] — [[Emiles 2021 da Lucyin Mahin/III|Moes d’ måss]] — [[Emiles 2021 da Lucyin Mahin/IV|Moes d’ avri]] — [[Emiles 2021 da Lucyin Mahin/V|Moes d’ may]] — [[Emiles 2021 da Lucyin Mahin/VI|Moes d’ djun]] — [[Emiles 2021 da Lucyin Mahin/VII|Moes d’ djulete]] — [[Emiles 2021 da Lucyin Mahin/VIII|Moes d’ awousse]] — [[Emiles 2021 da Lucyin Mahin/IX|Moes d’ setimbe]] — [[Emiles 2021 da Lucyin Mahin/X|Moes d’ octôbe]] — [[Emiles 2021 da Lucyin Mahin/XI|Moes d’ nôvimbe]] — [[Emiles 2021 da Lucyin Mahin/XII|Moes d’ decimbe]]}}
</div>

'''Lete da Djåke Werner, sol kimince do moes d' djanvî'''

Binamé Lucyin, 

One bone an.nèye èt  one bone santé è 2021 à vos èt à vosse famile.

Tèze k'on s'porèt rvèye bin vite

Ku ça v vasse bin!

Jacques 

'''Lete da Dimitri Françwès '''

…po propôzer èn årtike pol Rantoele.

Bondjou, 

I gnè on sudjè ki r'vin asteûr din lè gazette, cè so on muvmint ki vonri bin ratatchè nosse provinsse ô grand-duché do luksembour !! djè ponri moton fé one artik so coula si vlé !!

:Oyi, come ça, ça n' sereut nén do restchåfé. 

::(li 27 di fevrî):
::Bondjou,
::P'tit tekste po li rantoel (divant one onte pu gros ) .
::Lu diférence inter djaler et djalter ??
::Djalter cè kwan i djale mè ku cu nè nin si fwart (-1) è ku l'glèce nè nin s'pèsse.
::Djaler cè kwan cè fwart è ki fô grètè lè glèce du l'ôto .

:Response:
:Merci. 
:C' est pus vite di l' esplikêye tecnike. Dji l' a rmetou:
:*sol Wiccionaire a "[[:w:Wikt:djalter|djalter]]
:* et [[:w:Edjalaedje|so l' eciclopedeye]] (tot metant k' c' est vos k' a fwait les fråzes, come di djusse).
:Dji ratind vosse grand tecse.

'''Lete da Djåke Plinnvå'''

Merci co 13 côps po [[Ine bone annêye, totes sôrs di boneûrs|ç' bea tecse la]].

Come dji l' a rçû d' vos, dj' el mete a vosse no sol Wikisourd.

Si ça vént d' èn ôte sicrijheu, cnoxhou u nén cnoxhou, dijhoz mel.

Et vos pareymint, clapante anêye 2021, la k' on pôrè motoit eredjistrer "Li bijhe et l' solea" avou des Hutwès, po "rimpli les vudes" (si nosse camaeråde li catåre chinwès nos l' permete).

:Merci po tos ces renseignmins !
:D’ji deu v’dire qui  ça vént d' èn ôte sicrijheu, di’m costé nén cnohou, 
:D’ji l’a r’çu d’on camarôde
:Bonne djourneye

'''Manfred Lejoly, li 31 di djanvî'''

Binamé Lucien,

Dièrine limite !!! … ca on dit qu'on-z-a tot l'meus d'djanvîr po sohaiter lè bone an.né.

Djè so camus d'esse si tanrd.

Dj'espére què veus èt vosse famile estoz toudi hêtés.

On M. Hurdebise dè Logbièrmé vét dè m'apwerter dè vosse panrt [[:wa:Li paskeye do radon (live)|on clapant lîve sincyeus sol radon]]. Sècrit è walon dè pan on prof. d'Univ émer. !!!

èt co trasse côps merci !

Djo wande !

Manfred L.

:Vos eto, ene longue termene di haitisté, sins cron virûsse ni radon (vos m' end avîz djåzé, come cwè vos estîz dins ene contrêye foirt epestiferêye, adon dj' a sondjî a vos, et fé viker les cis do "Ståve des Boûs").

'''li 3 d' fevrî @ Nadine Delmåjhonwalone'''

…ki dmande sitrapanmint si nosse soce riçût di l' aide d' ene province.

Binamêye Nadine,

Merci po vost emile. C' est bén astcheyou ki dji polaxhe responde ossu rade (dji n' louke nén todi mes emiles do côp).

Nonna, li soce "Li Rantoele" ni rçût nole aide d' ene province, li kéne ki ça fouxhe.

Ki ça vos våye bén.

'''ås scrijheus(es) dins l' Rantoele, li 3 d' fevrî'''

Vola vnou l’ bon moumint po-z ataker li Rantoele l° 97.

Vola on pordjet di cotaeyaedje di ç’ limero la ki vudrè e moes d’ avri. Mins ci n’ est k’ on pordjet : i s’ pout racacandjî - come li cron virûsse - sorlon vos avoyaedjes di tecses, did ci å 28 di fevrî.

Boun eploctaedje, et bon ratacaedje d’ ene vicåreye « come divant l’ guere ».

'''Emile Djåke Desmete do 9 di fevrî'''

Bondjoû Lucyin

Li p’tit fi da Mr Tilkin è-st-ocupé à rachoner lès scrîjadjes è walon avou leûs rèdjaurbadjes en francès po-z-é fé on lîve d’aviès 60 pâjes. I voureût èto, monter on p’tit concours : c’èst li qu’ènnè sèreût l’ sècrètaire, dissus lès manières di causer di s’ grand-pa : Membe do jurî : Djan Hamblenne, Lucyin Mahin (avou ç’ qui ça vout dîre po l’ Rantoele), Jacques Desmet, èt dji d’mandereû à Joseph Decossaux d’ Our-grand d’ènnè yèsse éto, li qu’a l’ minme linguadje. I sèreût bin binauje, di r’trover dès bokèts di s’ grand-pére dins l’ Rabtoele, èt po l’ concours, vos savoz mia qu’ mi ç’ qu’i faut fé.

Tot ratindant, dj’a r’prins s’-t-ovradje po sayî d’ l’achèver : L’èvangile da Sint Djan, commincî pa l’ grand-pére.

Mès deûx plaquètes :

1° [[Rim-rame 2020]], avou lès dessins da Christian Lemeur èst prèsse po l’imprimeû.

2° Po « Veûy voltî » dji n’ ratind pus qu’ lès novia dessins da Ch. Lemeur. Tot a sti corèdjî pa Chantal.

Èt po continouwer, TOS lès djoûs dji mèt mi p’tit Aïku et one powésîye dissu m’ pâje facebook, ça ‘nnè faît d’dja 22 pâjes.

Mèrci branmint dès côps po tot ç’ qui v’s-avoz d’dja mètu su Wiki.

Quand vos r’vêroz co, nos nos r’veûrans po mète tot ça d’ssu pîds !

Alez, on-z-a co d’ l’ovradje !

Maujeni

PS dji n’a vindu qu’one vintin.ne di « Novèles, ça èva piane-miane. Et dji fais on rèdjaurbadje dè l’ pîce da Robert Lamoureux : La soupière po Lès-Isnes.

:Merci po les noveles.
:''La soupière'': gn a on bea mot do costé l' Ôvifa: [[:w:Wikt:goflete|goflete]]. Mins i l' fåreut espliker ås djins divant l' pîce.
:Concours: po cwand ? Endè fåt i djda djåzer dins l' 97 (rexhowe e moes d' måss u avri) ?
:Dji n' sai nén co cwand ki dj' va rivni. Fåreut k' les (viyès) djins soeyénxhe libes di rsôrti et fé des raploûs.
:Snaps: [[Li Diåle da Canva|prumire videyo so Wikisourd]].
:Si vos l' vloz rortofrafyî a môde do roman payis, vos l' ploz mete direk tot clitchant sol rodje messaedje ådzeu (e Feller, shuvant l' eredjistrumint)
:Christian Lemeur: come vos estoz e hant avou lu, dimandez lyi on côp si on pôreut mete les tecses k' il esplaide dins l' "Mouchon d'Aunia" so Wikisourd. Dji lyi aprestêye dedja ene [[Oteur:Christian Lemeur|pådje d' oteur]]. S' il est d' acoird, i nos pout avoyî les tecses tapés.
:Ki ça vos våye bén (adon, avoyîz les facteures do medcén, dji vos les payrè). 

'''Response a Lemeur pa Djåke (li 11 di fevrî)'''

Oyi, les desséns dimorèt todi prôpieté do dessineu, cabén k' elle åyexhe sitî eplaideyes ene sadju. Minme les posteures publikes, el Beldjike (come li vatche di Djiblou, li tchvå d' trait d' Libråmont, li cier di Sint-Houbert), ni plèt nén esse metowes so Wikipedia sins l' åjhmince do sculteu.

'''Desmet, li 10 di fevrî'''
Bondjoû Lucyin,

Vos-avoz d’vu r’çure l’ émail da Tilkin avou s’réglimint èt lès d’néyes dè l’ concoûrs qu’i vout mète su pîds. Vos d’vrîz lî èvôyî vos-idéyes : vos-èstoz dins l’ walon dispus plus longtimps qu’ lî !. Dès lîves nos-ènn’avans à d’ner ! Dji m’va r’lîre tot ça à m’n-auje…

Bone djoûrnéye

'''Response a X. Tilkin pol bate di mots walons ristitchåves dins l' francès d' Beldjike (li 11 di fevrî)'''

1. Pol dierin djoû: 30 di setimbe: paski pocwè?
1.1 bon po Geuye-Noere;
1.2. si on vout fé ene pitite fiesse coirzenoxh, dj' espere esse la e moes d' octôbe, dabôrd ki dvant… c' est l' cron virûsse k' est mwaisse. Pocwè on ptit raploû?
# Paski on nd årè stî spani èn an et dmi å long;
# pus pratike po dner des lives
# pus valixhant di dner on biyet d' 100 €, ki trover ça come chife so on conte.
# les djins ki seront la pôrént tchoezi inte totès sôres di lives (end a po fé !!!), les cis d' padzo et co des ôtes.

2. Prumire lisse di lives (les cis k' gn a sacwants egzimplaires): (…)

3. troejhinme djuri: nonna, dji n' so nén po m' î mete, paski
1) i fåt sayî d' awè des pus djonnes u des cis nén tant cnoxhous (pocwè nén dmander … ?). U, ôtrumint, a des "scrijheus confirmés" come …).
2) insi, dji pôreu enonder des djins po pårticiper (dji n' les pou nén aidî et esse djuri).

Vola l' cayet.

4. Adon, kî çki pout fé on ptit prezintaedje e walon pol Rantoele 97? Vos, Samouwel ?

:Merci Lucyin,
:Po li treuzieme mimbe do jury, Jacques Desmet, que vos cnochoz tertos est d accord.
: ''Je pense que trois juges suffisent. Qu'en pensez-vous?''

:oyi, troes, c' est grandmint assez (cwand deus waloneus si rescontrèt c' est tot feu tot flame; i fwaiynut ene soce; avou on troejhinme, ça va co a mitan, mins s' end a cwate, c' est li cminçmint des margayes, deus d' on costé et deus d' l' ôte, adon, end a deus ki moussèt foû po rfé ene ôte soce).

:C' est po rire, bén seur, mins [[:w:Wikt:gn a pont d’ cafloreye vatche ki n’ åye di taetches|gn a pont d’ cafloreye vatche ki n’ åye di taetches]] !!!

::Response al kesse di mete èn ôte mimbe do djuri.
::Mi, dji vou bén eto ki Dimitri deye li sinne. Dipus k' on est d' fôs, dipus k' on reye. Mins adon, si c' est 2 conte 2, i fåt decider kimint k' ça va.
::Mins asteure ki totafwait est so les rays po les djuris et l' reglumint, i fåt TROVER des bateus. Rén k' avou l' riclame sol Rantoele, vos n' åroz k' deus pelés et troes tondous (ey eco !). Por mi, i fåt ratôtchî les gazetes e walon, mins nén anonimmint u pa emile: pa telefonaedje di djin a djin. Come l' idêye est pol francès, i fåreut ossu k' i gn åye des racsegnes so les GAZETES E FRANçèS. Mins la ossu, nén avou des emiles, mins tot houcant direk les gaztîs u gastresses.
:Normåldimint, e moes d' octôbe, on s' divreut poleur rashonner (c' est on minêyolodjisse (des biesses) ki vos l' dit). I fåt ddja tuzer WICE. Pocwè nén å "Eter-Sambe-et-Mouze", li restorant da [[Oteur:Michel Robert|Michel Robert]] a [[:w:Djerpene (viyaedje)|Djerpene]]. Ça enondreut ene ôte coine po fé awè des bateuses. 
:Mins c' est a vozôtes a vey cwè; dji di ça et dji n' di rén !!!

'''Emile da Richard Joelants, li 10 di fevrî'''

Vochal on tècse: [[Mi come aprindice li prumîre cwinzène]]

Dj'a co d'vins mès afêres brâmint dès tâvlês del vèye di c'timps là, ci çoula v's-ahâye dji porcûvrè.

Avou dès mercis, Lucyin.

:Oyi, taiss, ki nos estans prindeus. Ci serè pol coine "istwere (del societé)" u so li dzo del pådje di ratacaedje.
:Ploz dire kéne anêye k' el paskeye s' a passé (po bén comprinde li valixhance di 2 francs, ki va payî l' pwin d' ene samwine)?
:Å dfwait d' Wikisourd, dji vos a recråxhî [[Oteur:Richard_Joelants|vosse pådje d' oteur]].
:Dj' î a metou tot çou ki dj' aveu "dins mes axhales", et eplaidî dedja cåzu çou k' aveut passé dins l' Rantoele.
:Si vos avoz co des ôtes sicrijhaedjes ki vos vloz mete, evoyîz nos lzès, et bén scrire k' on les pout editer so Wikisourd (a mi u a Djulén Casters, l' askepieu et mwaisse ovreu so Wikisourd, ki rçût ene copeye).
:I nos fåreut ossu vosse date di nexhance (dj' a metou diviè 1937, come vos avîz 7 ans dins l' paskêye des robots, dandjreus e 1944.)
:Po vosse foto, si vos nd avoz ene pus fene (c' est todi l' cene del shijhe do Coirneu di 2003, ki dj' a rcôpé d'ene pus grande).
:A ! eco ene sacwè ! Si vos estoz e hant avou li fi da Françwès Nyns, s' il a co les fitchîs des "intrez don", nos les metrént ossu foirt voltî so Wikisourd, po-z adiercî li sohait del gazete: « Ene riproduccion, minme pa ptits bokets, est todi foirt ricmandêye, tot raplant, bén seur, li no d' l' oteur. »
:Merci bråmint des côps.

'''Response a Mårtene (li 17 d' avri)'''

Merci po les noveles.

Dj' a ddja yeu m' prumî eploctaedje (vaccin) londi passé.

Dj' a rovyî (dispu 6 moes) di t' dimander di clôre li gåz (dji croe k' dji l' a lai å lådje).

Ki ça vos våye bén a tertos.

'''Corespondance avou RCF eyet Bernard Van Vynckt po-z evoyî s'live'''

RCF: a kî fåt i evoyî ls lives ki vos avoz payî ?

:Dj' end a ddja yeu onk dins èn evoyaedje da Pire Otjacques å Marok (dji n' sai ddja kî çki lyi aveut dné, ni s' il est compris dins les cwate). Dj' aveu dmandé a Bernard di m' end evoyî onk a mi adresse a Transene. Est çk' i l' a fwait ?
:Vos ploz evoyî l' restant (2, 3 u 4, shuvant) a m' sour a [[:w:Lîssin (viyaedje)|Lîssin]] (come c' est ddja ene grosse pactêye, dj' inme mî k' i gn åye ene djin la).
:Po vosse goviene, dji so ki scrît ene [[:w:Rastrind,_saiss_!_(tecses)|pådje sol live sol Wikipedia e walon]].
:Gn årè èn ôte [[Corwaitaedje di « Rastrind, saiss ! »|corwaitaedje sol Rantoele 97]].
:Co on côp, proficiate po tote cist ovraedje la (emissions, live, eplaidaedje éndjolike des fitchîs odio…). Dji nos rafiyans di lére et d' schoûter les noveas biyets e 2021.
:Ki ça vos våye bén, adon: c' est mi ki payrè vosse docteur.

::Response Pire: Bin l’ bondjoû Lucyin,
::Lu lîve da BVV ku dju v’s-è èvoyé c’astot la bistoke du nouvèl an.
::Rin a vèy avu vosse comande du 4  lîves.
::Kçvvb
::Pîre

:Abén merci po vosse bistoke !!! ça m' a permetou di ddja fé l' corwaitaedje pol Rantoele 97; il est ddja [[Corwaitaedje di « Rastrind, saiss ! »|ciddé]].
:A bénrade !

:::Response Bernard: Bondjoû Lucyin,
:::Dji v' pèspond dins l' lingadje si Nameur, bin sûr ! Dji n ' djoûwe nin aujîyemint avous cès indjoles-là èt come dins lès laîds momints do Corona, dj'a stî à l'ovradje tos lès djoûs, coplé aus scrîjadjes walons, èt, èt,... dji n'a nin vèyu passé vosse mèssadje. Dj'a d'mandé à Aurélie, li dirèctrice di RCF, si vos vlorz bin di v's-èvôyî lès lives qui v' dimandoz. Combin au jusse ?
:::Qui tot vos vaye bin, don !

::Mi: gn a rén avou ça. Dj' ofrixhrè les lives a des soçons po leus oûs d' Påke.
:: Serîz d' acoird po k' on mete onk des biyets (ou minme deus) [[Oteur:Bernard Van Vynckt|so vosse pådje Wikisourd]] ?
:: Ci sereut clapant ossu d' awè l' fitchî odio (on l' metreut sol pådje, po schoûter et lére sins rujhe). Gn a èn egzimpe [[Li_veye_k’_eva|vaici]]
:Si vos vloz bén, avoyîz mu les fitchîs (u dmandez a Aurélie d' el fé). Dj' elzès metrè al boune plaece, mins après, i fårè acertiner ås "controleus" do Wikipedia ki vos estoz bén d' acoird. La eto, ci n' est k' ene mailete (emile) a-z evoyî, et Aurélie (u ene ôte djin d' RCF) el pout fé a vosse plaece.
::Mins dji di ça et dji n' di rén !
::Ki ça vos våye bén… (vos cnoxhoz l' restant ).

''' Avou Michel Francard, sol fiesse ås lingaedjes walons'''

Mitchî: Mès chérès djins, (… rastårdjaedje do raploû do 3 d' måss disk' å 7 d' avri…). Juskar la, wêtoz a bin prinde sogne du vos-ôtes, mès chérès djins.

:A ! Motoit bén ki dj' î pôreu esse… dijhans todi kécfeye ! Si les gros bateas Marok-France riprindèt å 1î d' avri… U les ptits feris Marok-Espagne. Li ci ki vicrè l' sårè bén…

::Poûrot-i valèr ku ça arive !

'''emile da M. Lidjouli do 15 di fevrî'''

Djo wande, Lucien !

Dj'espére què veus èt vosse famile estoz co toudi bé hêtés. Cuèmint est l' situwantion ol contré là qu'vos dmanez?

Tote aute tchwè: an d'fait des sornos què pwèrtèt les dgins des viyadges avan vola.
* ces d'Finmonvèye = Turcs.  On-z-a solu oy' pusieûrs desplications, mais i gn'a ré dè prové.
* po les autes cas, djè pinse què çoula n'a ré à vèy' avou l'caractère des dgins, mais qu'i s'adgiche dè djeux d'mots, ''d 'assonnances'' : Stinba + Ôvîfa = baras ; Hofrai= côrts cotrais, Longfaye= longuès payes , èt co pé:  Ôtrowantche = cous an landge (sic).

:Oyi, gn a les deus "mecanisses" dins les spots des viyaedjes.
:* èn etruvén u ene djin "foû-ordinaire", u ene piceure tipike do viyaedje (A Glaireuse, c' est des scarbotes (cherfons): pask' i sont noers pask' i s' tchåfént al troufe ?
:* FOIRT SOVINT on rimaedje
:Di nosse costé: A Transine c' est des Ouline (Transene / Halenes); a Viance, c 'est des pele-panse; Libin, des tchins.
:Pacô, i fåt rtrover l' rimaedje dins èn accint vijhén: A R'dû des Tchitchoûs (paski c' esteut signurreye di [[:w:Stegne|Stegne]] et la c' est ddja l' Fåmene, => A R'doû, c' est des Tchitchoûs (po "tchitchåd", k' ont des tchitches = des catches so les ouys, pask' i magnèt må, sins vitamene, prumî viyaedje di l' Årdene).

:Ci-vola, pol minêye, il ont l' air di bén mwaistri l' cayet (il ont "reclôs" djusse les grandès veyes ki sont foirt acsûtes). Mins dispu l' Noyé, tot l' payis est recahouté a 8 eures al nute (cloyaedje des botikes), regayolaedje des djins dins leu måjhon a pårti d' 9 eures; les hoûlåds des djindåres vont do cwårt a ût disk' al dimeye di nouv, fijhant l' toû do viyaedje.

:Dj' a yeu m' prumire dôze di vaccin londi passé. Ça s' passe militairmint, avou nén onk k' a l' droet s' i n' est nén ahoukî på "tchampete" et metou so on fitchî cintrå (dj' esteu "deujhinme priyoritaire" avou les 65-75). Les Francès n' pôront pus dire: "''Au Maroc, c'est le souk''".

:A l' ovraedje, on n' a måy pont yeu d' rujhes (on est des ovrîs del mezåjhe). Djusse: tote li poytreye (50 % di mes rintrêyes) est foirt dilåbrêye (pupont d' fiesse, pupont d' restorants k' ovrèt del shijhe => waire di vindaedje di polets). Metans cisse samwinne: pris do kilo d' polet so pî: 8,5 DH (0,8 €); pris di rvén +- 10 DH (0,9 €).  Parey pol laecea (todi l' minme pris, adon k' les torteas ont rmonté d' 20 %, et li strin s' vind a 5 € po on botea d' 15 kilos, a cåze del setchresse 2020); lacobén k' on vént d' awè des bounès plouves so decimbe, djanvî et fevrî (dimwin, plait-st a Diu). Waitîz ké hopea d' nivaye !!! ([[:w:Passåjhe des Ayites Imi|e mitan do Grand Atlasse]]).
[[Imådje:Passåjhe Ayites Imi meur nive oto dilé.jpg|thumb|center]]

Tote aute tchwè : o dico d'potche djè trouve po l'français ''courone'', lè rf. w.'' corone''
Poqwè louméz-v les corona-virus  ''cronvirus'' ? . L'ajectif 'cron''  nè vout-z-i nin dire one saqwè come ''tordu'' , ''malformé'' ? Nè fanreût-z-i nin dire '' virus à corone'' ?

:Oyi, mot po mot: virûsse al corone; e-n aplacaedje tîxhon: corone-virûsse; avou on loyén inte les deus mots come dins borguimwaisse: coronivirûsse; avou spotchaedje do prumî pî, come dins c(o)mincî / k(i)mincî / k(è)mincer : [[:w:cronivirûsse|cronivirûsse]].
:Come ça rshonne foirt a "[[:w:cron virûsse|cron virûsse]]", ci lomaedje la a stî foirt eployî, po rire, dins les cåzaedjes inte waloneus (so les [[:w:rantoeles di soçnaedje|rantoeles di soçnaedje]]).

'''Emile a Djan Hamblenne, li 12 di måss'''

Co [[Lete_sint_P%C3%A5_%C3%A5s_Galates/III|on boket del lete ås Galates]]

…avou ça ki dj' a-st eredjistré les versets 21 a 31.

Co on côp : li ratournaedje e neyerlandès est mo mo (= foirt foirt) plaijhant. Dj' a djusse sitî a stok so on mot (''vervolgen'') et nd aler taper èn ouy so l' inglès. Foû diferin et bråmint pus "crawieus" (plin d' grands mots) !!! Fåt nén dmander l' ci e francès (ki dj' n' a nén sti vey, mins come li francès, c' est on lingaedje ki s' plait todi dins l' grandiveusté…).

Dj' evoye copeye a Bernard Van Vynckt, lu ki lét les gazetes e flamind (Rastrind, saiss p. …); por mi, c' est on bon lingaedje po ratourner did la aviè walon; dj' aveu ddja sayî, divant çoula: l' arabe (avou des aidants ki l' kinoxhént bén: foû målåjhey), l' inglès avou passaedje å francès cwand dj' esteu a stok (deujhinme lete ås Corintîs).
A! co åk. Dj' aveu-st eredjistré on ptit passaedje del [[Prum%C3%AEre_l%C3%A8te_da_Paul_aus_djins_d%E2%80%99_Corinte/I|prumire lete ås Corintîs]] avou Maurice Debaty.

Vormint damadje ki dj' n' a nén fwait dpus (mins dji n' kinoxheu nén l' ome, et i dveut ndè raler).

Boune fén d' epestiferinne, et bons picaedjes !

'''lete da Tiri Dumont do 17 do måss'''

Bondjoû Lucyin,

Dji vén seûrmint d' rintrer a Wagn'léye dispû deûs mwès èt dj'a trové li lîve è walon sul radon ki vos m'avoz fé avoyî po mès strimes.

Grâce bran.mint dès côps.

:Gråce bråmint des côps  po vosse merci (deus mercis ni s' batèt nén). Si vos l' lijhoz et awè l' tins di fé on ptit corwaitaedje pol Rantoele 98 (li cene des 25 ans del soce), ci sereut dvant li 31 di may (dins 2 moes et dmey).
:Ké noveles avou l' minêye ? Todi bråmint do brut po deus côps rén ? Mi, dji so "houré" - dijhans todi kécfeye - : dj' a ddja yeu mes deus eploctas !!!

::On voûreut ben qui l' minéye fouxhe oute po d' bon. Po les eploctas, kécfeye l'anéye qui vent po nozôtes, les co djonnes...
::Kçvvb

'''da Djan Goffart, sol nén-arivaedje do papî do Ptit Louwis pol Rantoele 97'''

Disbautchî! 

Mins èvoyî 4 côps su Mail. El preumî, c'èsteut à min.me timps qui lès-imâdjes (èl 22)! Sins roubliyî in côp su l'mèssâdj'rîye di vo FB "louline vôye"!

Vos l'avèz yeû au mwins????

:Nonna. Dji louke sol Fesbok.
:Oyi ! La, il a bén arivé (mins come mi, dji n' î va nén sovint...). 1000 escuzes.
:Dji n' sai nén çou k' gn a yeu avou l' emilreye. Motoit ki ça a stî tapé dins les spamaedjes. Did wice l' av evoyî ?
:Come li Rantoele 97 est ddja fwaite, on l' wådrè pol 98 (come c' est "istorike", ça n' aviyit nén). 
:Si vos avoz co on sudjet pus "actouwel" adon, on lairè deus pådjes å Ptit Louwis, po k' i n' soeye nén mwais.
:Figurez vs ki dji n' fijheu pont d' bén por vos. Dji creyeu ki vos avîz stî atrapé do cron virûsse !!!
:Co on côp escuzez mu: dji n' va djamåy rinaxhî so les spams. C' est seurmint la k' il ont-st arivé. Dj' a ddja yeu l' cas avou les emiles do Muzêye do Pårlaedje.

:: Oyî, i pout chèrvu pou l'98! Vos 'stèz pârdonè ... mins bon pou in côp ènn'do! Ahahahah!

'''sol raploû éndjolike Zoom raté, avou les cis del bate di beas mots walons'''

Dji n' kinoxheu nén Monsieu ZOOM. Dji creyeu ki ça aléve esse avou ene hårdêye evoyeye pa emile, a clitchî dsu po-z ariver al såle do raploû.

Restorant a Djerpene: on n' est nén oblidjî di magnî (ni d' mindjî). On pout djusse prinde ene boune cråsse pinte. Dji vou vo bén payî ene tournêye.

DATE do rindaedje des pris: por mi, li pus près possibe APRèS l' Tossint. Li mierkidi 3 u djudi 4 di nôvimbe mi shonnnut bons, eto po l' cåbartî.

Si on fwait on ptit spectåke avou ls efants, ci serè dins ene ôte såle (end a seur sol comene di Djerpene) => li rpassaedje å restorant dimeure po les cis ki volnut. Adon, purade on mierkidi di l' après-nonne po ls efants (il ont co condjî adon?). Bate di dvizes do djuri a 10 eures. Marinde des djuris å restorant, tchaeke paye si scot - mins dji pou dner on côp di spale po les nén-rintîs (=nén-pinsionés); spectåke et rindaedje des pris a 3 eures. Ripassaedje po boere li cougnet, po les cis ki vlès, a 5, 6 eures.

Rimete les decidaedjes: pol 20 di nôvimbe; gn a do tins po fé inte li 6 et l' 20 !!! Come ça on a l' tins di dmander les limeros d' telefone pa emile, d' houkî les djins, et d' sawè kî çki vénrè a Djerpene.

Bouter avou les tåvlêyes-copinreyes et les efants do walon e scole : boune idêye, mins fåt ki l' minêye soeye houte. Et ci n' serè nén divant l' moes d' djulete => bouter k' araedje tins des grandès vacances (po les copinreyes ki rdrovrént, et les efants di scole k' årént des ocupaedjes di vacances bén adjinçnés d' avance), ey å ratacaedje des scoles e moes d' setimbe (plait-st a Diu).

Evoyî les lives pal posse: OYI; dj' el vou co bén fé (li 4 u l' 5 di nôvimbe) et payî les timbes.

Lisse des lives: OYI. So Berdelaedje. Dj' a ddja dné les cis ki dji vs pou ahessî avou.

Atôtchî Michel Robert: pa telefone (i n' riwaite nén sovint ses 1000 et des emiles). Dji nel pou fé (dji so å diåle et co pus lon). Li ci k' el frè: dijhoz lyi k' c' est mi k' a dné si adresse.

Ôtès bouyes: dji vou co bén fé on rmetaedje e Feller-Haust po les Lidjwès, s' il astchait. DINER D' L' IMPÔRTANCE å payis d' Lidje (atôtchî Noer Dessén, Vlan, La Wallonne, Muzé do Vicaedje des Walons, motoit minme li scabene del culteure ki c' est leye ki s' ocupe do Pris del Veye di Lidje).
https://wa.wikipedia.org/wiki/Pris_del_Veye_di_Lidje

Ardans, les vayants !

:Response Djeråd Tilkin : Bondjou
:Vos avoz scri k'vo n'kinoxhoz nin Monsieu zoom.
:Kinoxhoz mutoit Monsieu Whatsapp? C'est gratis. Si OYI, adon estoz vs OK di fè (in djou?) in raplou Whatsapp po l'concours?
:Branmint des grâces,

::Mi feme a çoula so s' telefone. Motoit k' elle el sårè fé aler. (mi, dji n' m' a måy volou mete ås sûtifones).

'''Avoyaedje pa V. Romin del videyo da [[:w:Bob Dechamps|Bob Dechamps]] "c' est on fayé payis ki l' Payis d' Tchålerwè (li 19 di måss)'''

Response:

Merci bén, vos, Viviane. C' est dit avou on cour ki dji n' aveu djamåy oyou.

Dj' el revoye a Samouwel, s' i nos sait dire kî çki l' a scrît (9 côps so 10, Dechamps riprind todi des tecses d' èn ôte sicrijheu).

:[Dji m' sovén bén do tecse come li djheut Bob Dechamps, mins dji n' sai kî çki l' a scrît.]

::Merci, vos, Viviane. Ns alans cweri après. S' il est moirt dispu di pus d' 70 ans, on l' rimetrè so [[mwaisse pådje|Wikisourd]]. 

::Vos ploz fé li rclame di ç' waibe la di vosse costé, s' i gn åreut des scrijheus e walon k' î vôrént mete leus tecses.

::: Response a Noere-Gueuye

:::Bondjoû Lucyin,

::: Dj' a bén riçou vost emile (li ci k' vos avoz evoyi a Madame Viviane Romain), mins dji n' a nén riçou l' tecse ubén l' odio da Bob Dechamps avou didins. Ploz-vos m' el evoyî, s' i vos plait ?

:::Amiståvmint,

:::Èl-Gueuye-Noere

::::Response a Noere-Gueuye.

::::Vos l' divrîz poleur [http://lucyin.walon.org/videyos/BDech_plouve_6000.mp4 aberweter did cial]:

::::Dj' a sayî del rimete dins ene libe cogne .webm, mins il est "seré". Vos î cnoxhoz po l' "disserer"  ("craker")? Ôtrumint, dji dmande a mi infôrmatikî.

::::Po sawè kî çk' a scrît l' tecse, vos pôrîz dmander a Aude del Måjhon des Walons.

'''A Djan Cairon, li 27 di måss: deus troes ptitès sacwès'''

Ké noveles a Mont-Sint-Wubert?

1. Li Linusse SuSe ni s' raponteye pus. Gn a on messaedje d' ereur.

2. Pol Rantoele ki vént (=> divant li 31 di may, vos avoz co 2 moes), ci sereut clapant di fé on tecse so "nosse bressene tins del minêye", po comprinde kimint ene "sipitape"  (eterprijhe-djermon) a saetchî s' plan tins del rascråwe.

Cial, li minêye a l' air di ndaler. Tos les vîs (dipus d' 60 ans) ont yeu leus deus pikeures. On vierè bén cwè avou l' cwareme (dins 15 djoûs, si on leve li regayoyaedje di nute).

Les dierinnès videyos di scolaedje (Souzane et mi) sont [https://www.youtube.com/channel/UCDMFF5krTuQi9WmRbUd23qg rashonnêyes so VoBuze].

Si vos djåzez co padecô walon avou Zeliye, ci sereut clapant d' eredjistrer sacwants mots k' ele dit bén, po lzès mete so les cmons [[:c:Category:Audio_files_of_Walloon_words_by_schoolchildren_taught_in_Rifondou_Walon|dins ç' categoreye ci]].

Mins ni vs fornåjhixhoz nén. Dji sai bén k' avou l' ovraedje, li bressene, et l' famile, ci n' doet nén esse åjhey di trover cénk munutes.

Bondjoû al feme, ås båsheles, a vos parints (dedja eploctés ?) et a tos les Walons et Walones.

:Response: Bondjoû Lucyin,
:Binåjhe di vs ôre. Tot va bén vaici a pårt al creche ewou çki c' est l' revintreye amon les pwericûtreces.
:Pol pont 1, li råjhon c' est kel sierveu Packman ki vs eployîz (i nd a sacwants, des imådjes) n' egzistêye pus. :Vola çou ki vs fåt fé : (1) Alez dins Yast2 > Depots des Programes (2) Tchoezixhoz l' roye di Packman; (3) Clitchîz so "Candjî"; (4) Candjî l' URL do depot avou cene ci : https:... (5) Clitchîz deus côps so "I va" et ça dvreut aler.
:Pol resse dji va vey çou k' dji sai fé. Dj' a one samwinne et dmeye di condjî, mins avou efants. On voerè bén. :Dji va rwaitî l' videyo avou Souzane avou Zéliye.
:Des betchs a leye, a vos et a tot vosse famile,
:Djan

::Response: Gråces et beacôp des mercis. Ça a l' air d' aveur sitî po Linusse. I raponteye minme tot seu (li ci di dvant dmandéve k' on clitche dissu.)

Li semdi 27 di måss 2021 a 13 e 33 min 44 s CEST vos avoz scrît :

'''Lete da Djuråd T. (Les Såverdeas ni vlèt nén fé l' riclame do concours mots walons e francès) et response e francès da Djåke Desmet'''

Ci tecse cial (e francès da Djåke), mågré k' il est disbåtchant po les waloneus, divreut esse wårdé come temonaedje istorike. Pocwè nén so Wikisourd, e walon, motoit sins citer d' no d' djin. 

Mins sabaye kimint k' les ôtes soces di waloneus vont ascoyî l' pordjet ? Sovint, les moenneus sont des profs ki leu credo, c' est djustumint li purté des lingaedjes (il estént payîs po ça, on n' elzî pout nén rprotchî). C' est po çoula k' i fåreut atôtchî purade les GAZETES E FRANCèS del Walonreye. La vos årîz toplin des lijheus ki conoxhèt fok ene pitite miete di walon, ki pôrént sayî del sititchî dins leu francès. Dji tuze a des payis come El Lovire, la k' les djonnes eployèt coranmint on maxhaedje di francès et d' walon (temonaedje d' èn etervinant å fime "li langue åd dibout del linwe", 2018).

Do costé des gazetes e walon, dji vén d' aprinde ki [[Oteur:Anne Delporte|Anne Delporte]] (ene binamêye k' a ascoyî do bon costé l' ovraedje do rfondou dins les anêyes 1990), a metou ene deujhinme caskete, li cene del [[:w:Li_Walone_(gazete)|gazete "La Wallonne"]], a costé di [[:w:Nosse_Lingaedje_(gazete)|Nosse lingaedje]]

Vos, Djuråd, vos l' pôrîz motoit atôtchî, di m' pårt, si vos vloz.

Do costé des gazetes e francès, dji n' sai ddja si "Médor" a sorviké å côpaedje des subzides ås gazetes "critikeuses di l' eståvlixhmint" (do tins do govienmint NVA). S' i vikèt co, sayîz di vs mete e hant avou Céline Gauthier.

Ardans les vayants ! La 1980 ans et des rawetes, gn a èn ome ki pretchive e l' Palestene k' a stî codåné a moirt et ses shuveus trakés et rtrakés. Li fén des féns, dandjreus, adon. Ebén nonna. Asteure, 1980 ans après, gn a 1.300.000.000 d' djins ki deynut minme ki c' est l' fi då Bon Diu !!! Come cwè…

'''Lete a Lorind Hendschel do 2 d' avri'''

Binamé Lorint,

Ké noveles après vozôtes ? Dji n' a pus waire di noveles del Beldjike, mins come on dit k' el France va må, ça doet esse parey. Dji n' sai ddja si dj' pôrè rivni di l' esté.

Sabaye cwè avou vosse live d' arimés. A-t i vudî, come dit ?

Dji vos scrît eto po [[Oteur:Lorint_Hendschel|vosse pådje di scrijheu so Wikisourd]]. Come di djusse, vos î ploz mete tos vos scrijhaedjes e walon, minme s' i sont ddja ôte pårt. C' est pus e såvrité låvå.

Po « [[Li Ptit Prince]] », li Djulén (Casters), spoté Reptilien, l' askepieu del waibe, dimande ki vos dnîxhe cwand minme vosse benediccion, come ratourneu. Vos lyi ploz dmander kimint fé å djusse (so si emile u so [[Uzeu_copene:Reptilien.19831209BE1|s' pådje d' uzeu lavola]].

On fiestixh les 25 ans del Rantoele ciste anêye ci. Si vos årîz ene miete di tins divant l' 31 di may, ci sereut clapant ki vos racontrîz kimint k' ça s' a fwait (ci sereut l' ratacaedje do l° 98 d' esté). Dji n' sai nén si vos årîz co les fitchî des deus prumires [[Li_Rantoele#1994|Rantoele 0]] 

Si vos les rtrovez, tipez lzès so les pådjes dedja titrêyes.

Ki ça vos våye bén, et motoit a onk di ces djoûs.

'''Emile dal Gueuye-Noere'''
Bondjoû Lucyin,

Dji vs evoye cist emile ci djusse po saveur cwand li l°97 del Rantoele va esse eplaidî po tertos (po les cis k' is n' ont fé payi al anêye) ?

Amiståvmint,

Èl-Gueuye-Noere

:Response (li 3 d' avri): C' est todi on mistere avou Pire, cwand çk' il a l' tins po-z imprimer ey evoyî. Il a on deur mestî (årtisse des grossès biesses) et c' est l' pus laid des moumints, li moes d' måss (toplin des botniraedjes del nute). Dji n' lyi ridmande djamåy, po nel nén "taener". Si vos vloz, sicrijhoz lyi on ptit mot ([email protected]) mins dji croe k' i n' a waire li tins d' lére ses emiles. Si vos vloz, dji vos dene si telefone (dji n' l' a nén roci).

'''Response a Mitchî Francård pol rimetaedje del fiesse ås lingaedje walon + propôzucion å Muzêye do Pårlaedje'''

(copeye a [[Oteur:Joël Thiry|Djowel]] et a [[Oteur:Pierre Otjacques|Pire]])

Bén vo vs la bén arindjîs !!! Lacobén ki dji m' a rassåvé cial a tins (500 cas par djoû, 5 a 10 moirts, sins monter ni ridschinde. Et les pus d' 60 ans dedja cåzu tertos eploctés deus côps ! Les Francès n' poront pus dire: "Au Maroc, c'est le souk!" )

Dji pinse ki l' programe po "Foû des rays" est eto so flote.

@ moenneus do [[:w:Muzêye do Pårlaedje|Muzêye do Pårlaedje]]: come vos savoz, li binamé "Reptilien" (Julien Casters, ki rçût copeye) a fwait èn ovraedje "nouzome" po-z emantchî ene [[mwaisse pådje|waibe di tecses e walon so Wikipedia]].

Po Lidje, Tchålerwè et Nameur, on trouve toplin di scrijheus ki sont moirts dispu pus d' 70 ans, k' ont pout rcopyî, "riferlijhî" et rfonde come on vout.

Po nosse Basse Årdene, end a waire (djusse Alexandre et Mossiat). Adon, dj' a pinsé k' on pôreut dmander ås scrijheus dedja publiyîs do Muzêye, et k' leus lives sont spoujhîs, s' il acceptêyrént di mete leus ouves dizo libe licince (mins i seront todi rahoukîs come oteur, minme dins les riscrijhaedjes ou ratournaedjes dins des ôtes langues, s' il astchait.)

Po les cis ki sont moirts, i fåreut atôtchî les eritîs.

@ Djowel: si vos estoz d' acoird po onk di vos scrijhaedjes, [[Oteur:Joël_Thiry|dedja cités voci]], dijhoz nos l'

Dji tuze ossu a Calixte Culot ki vént d' mori (les eritîs sont co dandjreus bén eshonne), u, dins les vicants, a Robert André, k' a djusse sicrît on live.

Li condicion k' on dmande d' aveuri  (djusse pa emile) dit k' ene sakî d' ôte pout "rifé des sôs" avou les scrijhaedjes di l' oteur, çou ki pout ratni des djins k' i gn a. Mins e walon, do tins k' dji vicrans, gn a waire di tchance ki ça advegne… Pus tård, s' i gn a ene politike volontaire po rmete li walon "e s' plaece", ci serè motoit dins les lives di scole…

Mins dji di ça et dji n' di rén…

Boune fén d' parminêye (paski tot a ene fén, et gn a nole si grande guere k' i gn è schape on sôdår !, copurade ki les waloneus ont l' air d' awè bén stî spårgnîs).

:'''''Response''''': Pocwè nin? Dj' ènn-è djâzrè â prochin raploû do MPA.
:Ki ça v' vaye bin.  Frankès pougnèyes.

</div>
[[Categoreye:Ouves sicrîtes e rfondou]]
[[Categoreye:Ouves sicrîtes e Feller]]
[[Categoreye:Ouves sicrîtes dins ene ortografeye espontanêye]]
[[Categoreye:Letes]]