Difference between revisions 19644 and 19645 on wawikisource

{{tiestire
| tite = Emiles 2021 da Lucyin Mahin/IV
| oteur = Mahin Lucyin
| divant = [[Emiles 2021 da Lucyin Mahin/III|moes d' måss]]
| shuvant = [[Emiles 2021 da Lucyin Mahin/V|moes d' may]]
| aneye = 2021
}}

== Lete a Lorint Hendschel do 2 d' avri==

Binamé Lorint,

Ké noveles après vozôtes ? Dji n' a pus waire di noveles del Beldjike, mins come on dit k' el France va må, ça doet esse parey. Dji n' sai ddja si dj' pôrè rivni di l' esté.

Sabaye cwè avou vosse live d' arimés. A-t i vudî, come dit ?

Dji vos scrît eto po [[Oteur:Lorint_Hendschel|vosse pådje di scrijheu so Wikisourd]]. Come di djusse, vos î ploz mete tos vos scrijhaedjes e walon, minme s' i sont ddja ôte pårt. C' est pus e såvrité låvå.

Po « [[Li Ptit Prince]] », li Djulén (Casters), spoté Reptilien, l' askepieu del waibe, dimande ki vos dnîxhe cwand minme vosse benediccion, come ratourneu. Vos lyi ploz dmander kimint fé å djusse (so si emile u so [[Uzeu_copene:Reptilien.19831209BE1|s' pådje d' uzeu lavola]].

On fiestixh les 25 ans del Rantoele ciste anêye ci. Si vos årîz ene miete di tins divant l' 31 di may, ci sereut clapant ki vos racontrîz kimint k' ça s' a fwait (ci sereut l' ratacaedje do l° 98 d' esté). Dji n' sai nén si vos årîz co les fitchî des deus prumires [[Li_Rantoele#1994|Rantoele 0]] 

Si vos les rtrovez, tipez lzès so les pådjes dedja titrêyes.

Ki ça vos våye bén, et motoit a onk di ces djoûs.

:R.:Bondjoû Lucyin,

:Bén binåjhe di lére di vos noveles.  Li Beldjike si poite come ele pout, ele s' etrebuke dins des poteas d' vîruss... Mins ça va daler, s' apinse les Châlerwetîs.

:Mi live a vûdî a tins a eure amon https://www.editionstetraslyre.be/, gn a nouk k' end a atchté onk mins ...  rén d' novea dwai?

:Pol prumî limero del Rantoele, bén valet, vos veyoz tot bleu, paret.  Dji vén d' nanxhî ene hapêye pattavå m' deure plake. Dj' a rtrové bråmint ds afwaires ki doirmint dins l' poûssire électronike, et minme mi tot prumî roman (1992!) ki nouk n' a måy léjhou (la co bén!), mins nén les prumîs limeros del Rantoele.  Tant k' a scrire su ç' tins la, dji n' a pus waire di sovnances foirt claires des pondants et des djondants.  Minme sins émiles, on  s' sicrijheut troes côps al samwinne :-)

:Poirtez vos bén Lucyin, et les vosses avou, dji scrî sol côp å Reptilyin et dji va vey cwè po mete des ôtes cayets so wikisoûrd.

:Kçvvb

:: RR.: Merci d' vosse response.

:: Vosse live: oyi, asteure, c' est clair kimint l' aveur (ey eto les cis da Dominique Heymans et Jacqueline Boitte). Mins dji ratind d' esse rivnou e l' Walonreye (dji n' sai s' i les evoyrént å Marok).

::Gråces di mete tos vos "nén eplaidîs" et minme "eplaidîs" so Wikisourd. Minme si c' est des viyès sayes. Mi-minme, dj' a rmetou mes tos prumîs scrijhaedjes avou "pont d' ortografeye" ([[Lu warabê]]). C' est todi interessant di rvey kimint k' on tiréve si plan.

:::Dji va d' riscaner li prumî limero zero.zero (dji l' a co so papî). Li prumire pådje est ddja so les Cmons.

[[Imådje:Rantoele00.jpg|thumb|center]]

::Si vos pôrîz, sayîz d' raconter (di sovnance) kimint ki vos avîz metou li soce so pî e 1996 (mi dji n' esteu nén la).

::A ! dji rovyive ! So Wikimedia (les Cmons), i sont todi pus spepieus, aprume po les imådjetes di soce (logos). Come c' est vos k' aveut dessiné les deus prumires del Rantoele, elzès sårîz reberwetez vos-minme ? (pus åjhey ki di dner ene permission por mi l' fé). Dji vos les evoye avou les 2 d' après (dji croe ki c' esteut Stefane ki ls aveut fwait, mins gn a rén avou ça si vos tipez les 4, come vos prôpès ouves).

::A onk di ces djoûs (dijhans todi kécfeye !).


== Emile dal Gueuye-Noere ==
Bondjoû Lucyin,

Dji vs evoye cist emile ci djusse po saveur cwand li l°97 del Rantoele va esse eplaidî po tertos (po les cis k' is n' ont fé payi al anêye) ?

Amiståvmint,

Èl-Gueuye-Noere

:Response (li 3 d' avri): C' est todi on mistere avou Pire, cwand çk' il a l' tins po-z imprimer ey evoyî. Il a on deur mestî (årtisse des grossès biesses) et c' est l' pus laid des moumints, li moes d' måss (toplin des botniraedjes del nute). Dji n' lyi ridmande djamåy, po nel nén "taener". Si vos vloz, sicrijhoz lyi on ptit mot ([email protected]) mins dji croe k' i n' a waire li tins d' lére ses emiles. Si vos vloz, dji vos dene si telefone (dji n' l' a nén roci).

== Response a Mitchî Francård pol rimetaedje del fiesse ås lingaedje walon== 

Avou ene propôzucion å Muzêye do Pårlaedje''' (copeye a [[Oteur:Joël Thiry|Djowel]] et a [[Oteur:Pierre Otjacques|Pire]])

Bén vo vs la bén arindjîs !!! Lacobén ki dji m' a rassåvé cial a tins (500 cas par djoû, 5 a 10 moirts, sins monter ni ridschinde. Et les pus d' 60 ans dedja cåzu tertos eploctés deus côps ! Les Francès n' poront pus dire: "Au Maroc, c'est le souk!" )

Dji pinse ki l' programe po "Foû des rays" est eto so flote.

@ moenneus do [[:w:Muzêye do Pårlaedje|Muzêye do Pårlaedje]]: come vos savoz, li binamé "Reptilien" (Julien Casters, ki rçût copeye) a fwait èn ovraedje "nouzome" po-z emantchî ene [[mwaisse pådje|waibe di tecses e walon so Wikipedia]].

Po Lidje, Tchålerwè et Nameur, on trouve toplin di scrijheus ki sont moirts dispu pus d' 70 ans, k' ont pout rcopyî, "riferlijhî" et rfonde come on vout.

Po nosse Basse Årdene, end a waire (djusse Alexandre et Mossiat). Adon, dj' a pinsé k' on pôreut dmander ås scrijheus dedja publiyîs do Muzêye, et k' leus lives sont spoujhîs, s' il acceptêyrént di mete leus ouves dizo libe licince (mins i seront todi rahoukîs come oteur, minme dins les riscrijhaedjes ou ratournaedjes dins des ôtes langues, s' il astchait.)

Po les cis ki sont moirts, i fåreut atôtchî les eritîs.

@ Djowel: si vos estoz d' acoird po onk di vos scrijhaedjes, [[Oteur:Joël_Thiry|dedja cités voci]], dijhoz nos l'

Dji tuze ossu a Calixte Culot ki vént d' mori (les eritîs sont co dandjreus bén eshonne), u, dins les vicants, a Robert André, k' a djusse sicrît on live.

Li condicion k' on dmande d' aveuri  (djusse pa emile) dit k' ene sakî d' ôte pout "rifé des sôs" avou les scrijhaedjes di l' oteur, çou ki pout ratni des djins k' i gn a. Mins e walon, do tins k' dji vicrans, gn a waire di tchance ki ça advegne… Pus tård, s' i gn a ene politike volontaire po rmete li walon "e s' plaece", ci serè motoit dins les lives di scole…

Mins dji di ça et dji n' di rén…

Boune fén d' parminêye (paski tot a ene fén, et gn a nole si grande guere k' i gn è schape on sôdår !, copurade ki les waloneus ont l' air d' awè bén stî spårgnîs).

:'''''Response''''': Pocwè nin? Dj' ènn-è djâzrè â prochin raploû do MPA.
:Ki ça v' vaye bin.  Frankès pougnèyes.


== Pitit emile da Willy Marchal (do 7 d' avri) ==
Merci Luciyn, qui tot vôye bin por vos èt vosse famile .

Nos avans fét one sakwè avou Lèyon. Si vos v'loz veuye : c' est so "Matele".

:Merci. Dj' a sayî, mins dji n' trove nén (motoit k' i l' ont ddja rsaetchî). Si c' est ene sacwè libe, vos mel ploz avoyî. On l' metrè a boune plaece, avou on loyén clair.

Bondjoû a tos les copineus si vos fjhoz co des raploûs éndjolikes.

== Response a m' sour B. (15 d' avri)==

…ki m' avoye ene foto di s' famile, et mi dmander des noveles.

Ké bele famile ! I n' manke ki les ptits-efants ! I sont e scole ?

Ciddé, tos les vîs-paltots (dipus d' 60 ans) ont stî pikés (eploctés, vaccinés). E nosse måjhon, mi et F.. I nd ont fwait 4 miyons (ås 2 pikeures) so tot l' Marok, mins purade åtoû des grandès veyes (nozôtes, on est dins l' redjon "Cazablanca-Settate", c' est po ça k' on a stî dins les prumîs). Mins asteure, avou l' cwareme, c' est aresté. Avou ça ki les prodûts sont wårdés po les payis la k' c' est fabriké (Urope po Astra, Chine po Sinofarm). Les ôtes ni les åront k' å conte-gote.

On a cmincî l' [[:w:cwareme muzulman|cwareme]] on djoû pus tård ki les ôtes (pô d' [[:w:tinre lune|tinre lune]] dins li stoelî londi !). Pol prumî djoû, po cschirer l' vesprêye, on a stî pormoenner a velo avou Souzane divant l' disdjune. Mins ele ni shuveut nén. E mi rtournant, dj' a ridé dins ene årmeure, et toumé al tere. Ça fwait ki: on djno schavé, et on ptit toirtchaedje di pî. Bawaite ! ça våt mî k' ene djambe esketêye et les bokets pierdous.

Ciddé-atelêyes: kékes fotos, avou copeye a nosse M., po n' pont fé d' djalote.

== Emile Dimitri François do 22 d' avri ==
Bondjou Lucyin. Djespère ku v'z'alé bin .

Dju vin à vo pasku djè on malôji avou on mot. Fô scrire coula : LU GURNÎ Ô BROL su on panè d'bwè.

BROL esku coula su scrîi insi ou BROLES ?? 

Bin a vos.

:A ! bele kesse. Mins li mot n' est nén dins les diccionaires walons. C' est on beldjicisse ki vént d' Brussele.
''[[:w:Wikt:brol|brol]]''.
: On l' pôreut mete si on vout, adon come li [[:w:Motî_des_beldjicisses_da_Francard_et_aidants|motî Francard des beldjicisses]]. => Lu gurnî ås brols.
: MINS dj' inmreu tostant mete on mot pus walon: « Lu gurnî ås riketes », « Lu gurnî ås tchinisses », « Lu gurnî ås trigus »
:Todi a vosse siervice. 

== Lete da Djåke Desmet, d' ene discandje d' emiles avou Jacques Warnier ==
'''on p'tit forbatadje qui dj'a yeû avou Jacques Warnier, nin pus taurd qu'ayîr'''

(…) èt i faut lêyî ç' qui d'more dèl « societé » à dès djins qui n'è l' causenut pus…  

Djè l' vou bin crwère qui les djon.ne veyenut pus voltî li R'fondu po-z-aprinde li walon, i l' pudenut come n'impôte quén lingadje à-z-aprinde !

:R. Merci bén po les noveles. I fåreut esse boigne d' èn ouy et aveule di l' ôte po n' nén vey di kî k' on djåze. Come vos djhoz, c' est vormint damadje k' i n' saye nén di fé li vî tayon ki mostere ses ptits-efants, estô di yesse li prefet ki s' feme barbote tos les djoûs å matén, et ki s' rivindje tot fjhant rôler les pûnicions. 

:Merci po les coplimints po li rfondou. Dj' a yeu l' apriyesse di shuve on lomé Penêye dispu si tot cminçmint å scrire e walon. Gn a ni crike ni ni crake. I fåt todi cmincî pa les beas costés (metans, li scrijhaedje so des sudjets politicmint egadjîs, çou k' est råle come del manoye di Påpe); pu, pitchote a midjote, mostrer des manires d' amidrer kékes pitits ponts. Et n' si nén måvler si l' aprindisse ni shût nén vos conseys (motoit k' i n' a nén l' tins, k' i n' a nén bén comprins vosse messaedje...). So les wikis, on pout coridjî (u amidrer) sins atouwer li prumî scrijheu. C' est foirt consecant. Après, i pout vey çou k' a stî rcandjî, et s' amidrer... si i vout. Mins si vos l' regrignîz, c' est fini po todi. I n' sicrirè pus.

:L' ome k' on dit n' est nén l' prumî a s' kidure come çoula avou les ôtes sicrijheus. Çou k' i fwait, Maurice Piron l' a fwait dvant lu (''[[:w:Clairtés so les belès-letes e walon di nosse tins (live)|Clarté sur les lettres walonnes contemporaines]]''). C' est ene paskeye ki racmince, todi come todi.

:Åmen, c'est po les beguenes, åvé, c' est po les curés.



</div>
[[Categoreye:Ouves sicrîtes e rfondou]]
[[Categoreye:Ouves sicrîtes e Feller]]
[[Categoreye:Letes]]