Revision 88457 of "Fluplands" on zeawiki

[[plaetje:RM 33667 De Hoop 16-9-2011.JPG|thumb|400px|rechts|Flupland]]
't '''Fluplands''' is 't [[Zeêuws]] van 't [[Flupland (eiland)|eiland Flupland]].

==Stikje int Fluplands==
De Stationsstraete op Flupland was in [[1913]] al ’n ‘êêl ènde volhebouwd. An de kant daer à laeter de Julianastraete kwam was nog wat grond vrie. Neffen Merien van Levien mee Thona Deurloo; in neffen Arjaon Mol mee Pietje den Braeber was ôôk nog plekke vôôr un ‘uusje. Dae wou Diengeman de Rôôij in 1913 gebouwe.
 
’t Is a lank gelêêje mè d’ouwere Fluplanders è ze nog goed hekend, Diengeman in Kees de Rôôij. D'r grôôtouwers Jewannes den Braeber in Leuntje den Danser weunden in t’ êêste uusje van de Voorstraete, dêêls in dun diek hebouwd .’t Was pas nieuw in net opgeleverd . ’t Jongste, - ze was 't negende - kind van Jewannes in Leuntje kreeg de naem Elizabeth, mè ze wier altied Lies genoemd. 'n Knappe meid, die à’t ongeluk ao, toen à ze nog jonk was, dà ze in verwachting rocht. Niks biezonders want in dien tied moste d'r nog à wat getrouwe. Leuntje maekten wat mee mee die meiden. Êêst mee Griet, die most mee 'n Rôômse jongen getrouwe, in noe wêêr mee Lies, mè die d’r vrieër ei ze laete zitte. 't Is nie goed te praete, mè wà doe je 'r an as ouwer wezende. Lies kreeg op [[19 auhustus]] [[1820]] 'n zeune, ze noemden 'n Gert.
 
Vuuf jaer laeter trouwden Lies mee Wullem de Rôôij, 'n schipper. Lies bleef in 't wienkeltje van d’r ouwers in ’t diek’uusje weune. Ze verkocht booschappen in ellegoed. Achter 't uus ao ze 'n oven daer à ze brôôd in bakten vò d'n andel in dan ao ze ôôk nog 'n neerinkje in brandstoffen. Sloffen, turf, neutjes in wat àt 'r op dat gebied à nie te kriegen was. Wullem dee vee zaeken mee z’n eige schuutje, dus vrachtkosten kwaeme d’r nie bie . Wullem in Lies krege êêst twee dochters, Jannetje in Leuntje in toen 'n zeuntje Jewannes. Bie Jewannes groeiden de rozen laeter aok nie op z'n schoenen. Dat bliek wè à me ietewat uut z 'n leven anaele. Toen à 't n op leeftied kwam liep Jewannes 'n meisje uut Setalland tegen 't lief, Tannetje den Dekker êêten ze. Ie kreeg vuuf kinders bie 'd r, in bie 't leste, Tannetje, noemden ze dat meisje, is ze in 't kraembed hebleve. 'n Jaer of zevene laeter is Jewannes mee Maotje Gunter, ôôk uut [[Setalland]], hetrouwd. Ze was à fêêrtig toen à ze mee z'n trouwden mè toch bin d'r nog twee kinders gekomme, Diengeman in Kees. Kees was wat opgeruumder van aerd as Diengeman.
 
Voader Jewannes is zeven jaer nae à 't n hetrouwd was mee Maotje à gestoreve. Ie was nog mà 46 jaer. Kees in Diengeman gienge bie d 'n boer wèrke, in toen à in [[1907]] de Nieuwe Polder inhediekt wier krege ze kort daerop 'n paer bunder land van de Domeinen in pacht. Kees trouwden mee Koos Stêênpoorte uut [[Poortvliet|Poofliet]]. Die waere de dertig à gepasseerd; ze è êên kind gekrege. Die zeune, Jewannes, ei altied op 't sikketrie gezete in ie dee op verzoek ôôk we 's mensen uuttrekke . Kees de Rooij oa êêl vee moeite mee 't fietsen te lêêre. Dae gienge ze toen pas op laetere leeftied mee behinne, in à t’n deur de bocht gieng iew 'n z’n eige zo stief as 'n staeke, mee ’t gevolg dat 'n nogal 's in de slôôt terecht kwam. In z’n maots dan lache! À t’n wêê op de kant stieng zei Kees: "'t Zat vanochend al in z’n mieter, ik voelden ’t à toen ak 'n uut de schuure pakten" of: "Ik è d’n êêst us laete zupe". Z’n vrouwe Koos wier stokoud in overleefden Kees langen tied. Op ’t leste van d’r leven kwam de wijkzuster ze wasse. Dan was ze nog mè bie d’r knieën in dan riep Koos: "Ho, vârre genogt". Diengeman was nog un êêl stuitje langer bie z’n moeder gebleve as Kees, mè laet 'n dae noe nog 'n boeredochter tegen 't lief loape. Jewanna êêten ze. Daerom wou 'n un ‘uus laete bouwe dat toch n bitje anders was as d'aore. Lauw Kemp oa 'bie annemer Capelle 'n lapje grond op 't ôôg in de Stationsstraete neffen Merien van Levien. Diengeman kon nog un lapje kôpe an ’t ènde van de straete, vlak bie d’n Tramput. Ie vroeg an Lauw of à t'n nie wou ruile, want ie wou 'n uus mee 'n gank in ’t midden in vôren drie raemen. “Ik trouwe trek un boeredochter , in dan mô’je toch un bitje vô d’n dag komme”, za Diengeman gedocht è .
 
Lauw Kemp oa dae gêên moeite mee in ie ruilden de grond mee Diengeman. Ie liet de tekenienge maeke, in de vergunning was gauw rond. Capelle gieng an ’t bouwen in an de voorkant kô’je 't à zie oe à’t gieng ôôre toen de deur- in de raemkezienen gesteld waere.
 
Diengeman was 40 jaer, dus ’t wier tied dat ie mee Jewanna onder de pannen gieng. Kort vò 't trouwen, ze stienge à volop angeplakt gieng ’n wêê nae z’n anstaende vrouwe in d' n Achterweg om nog 't êên in 't aore te bepraete. 't Was dien aevend nie às anders. Jewanna was 'n bitje kort in d'r praeten in tegen à Diengeman dien aevend ofscheid van d'r wou neme zei ze: "Diengeman, ik kan 't beter noe tegen je zèhhe as à 't te laete is, ik zie d 'r toch mè van of. Ik bin benauwd à me trek êêlemae gezete bin à mè 't nie mee mekoare zulle kunne vinde. Jewanna maekten 't uut mee Diengeman, vlak voor à ze gienge trouwe.
 
Diengeman zat zwaer in de put; trek ’n mooi grôôt ‘uus in gêên vrouwe. Gelukkig was t'r nog un vrouwe op durp die à om Diengeman docht. Arjanna , de vrouwe van 'Piet Glijn', die zag allicht wè 'n gatje. D’r zuster Neel weunden op Bru in dae kwam ze dikkels. Die wist wè zo’n bitje oe of ’t gebaekend was mee de ouwe jonge meiden op 't durp. Êên van die meiden, Merina van den Bos, die schol 'n goed jaer mee Diengeman. Arjanna zei tegen z'n: “Ik wete ’n goeie vrouwe vô joe op Bru. Je mô mer us mee gae kommedeweke.”
 
Arjanna 'n kaerte nae Neel geschreve dà ze most zurrege dà Merina bie d'r was à ze kwaeme. 'd Oare weke gieng Arjanna mee Diengeman mee d’n tram in ’t veerpontje van Arjaon Oek nae Bru. Neel ao un wienkeltje in toen à de belle kliengelde kwam ze op d’r muulen nae voren. “Kom ter mè gauw in, de thee is à gezet in Merina is ôôk à gekomme”. Nae un stuitje praete trok Arjanna de stoute schoenen an. Ze was nie verlege om woorden in ze waegden 't om Merina te overtuge.
 
"Merina, ‘êêl je leven jonk bluve is gêên mieter gedae", zei ze. "Diengeman zit in’t zelfde schuutje, in ie ei 'n mooi ‘uus laete bouwe, wat dienk je d'r van? Dan binne je allebeie onder de pannen”.
Steenpoorte, Meriena de Rôôy - Van den Bos in Diengeman de Rôôy.

In werentug, ’t klikten tussen Diengeman in Merina. Op [[22 meie]] [[1914]] bin ze op [[Bru]] getrouwd in net vô de Kossemisse is Merina op Flupland inheschreve. Diengeman verkoevereerde zienderôôgen. Kinders è ze nie gekrege, mè wat waere ze gelukkug mee mekaore. Merina ‘ielp Diengeman op z’n lapje grond mee 't wiejen in in de zeumer liep ze mee 'n paer blikke bussen te rammele om de mossen uut de tèrreve te jaege. Merina stierf in [[1941]] in Diengeman in [[1950]]. Japje van den Bos ei 't spulletje van noam Diengeman toen g 'orreve. Ie veruusden toen mee z'n vrouwe Jannetje van der Oave van 't Stoofof vandaen nae 't uus mee 'n gank in 't midden in vôren drie raemen.
 

[[Categorie:Zeêuws]]